బస్ సర్వీస్ ప్రారంభించిన ఎమ్మెల్యే గండ్ర

జయశంకర్ భూపాలపల్లి జిల్లా రేగొండ మండలం రామన్నగూడెం తండా గ్రామంలో పరకాల నుండి జూబ్లీ నగర్ వరకు బస్ సర్వీస్ ను శనివారం ఎమ్మెల్యే గండ్ర వెంకట రమణా రెడ్డి ప్రారంభించారు. ఈ సందర్భంగా గండ్ర మాట్లాడుతూ రామన్నగూడెం తండా గ్రామంలో బస్ సర్వీస్ ప్రారంభించుకోవడం మంచి శుభపరిణామం అన్నారు. ప్రజల సౌకర్యార్థం రాష్ట్ర ప్రభుత్వం ఆర్టీసీ నష్టాల్లో ఉన్నప్పటికీ ప్రజలు ఇబ్బంది పడకూడదని ఆర్టీసీ బస్సులను నడుపుతోందన్నారు. ప్రజలందరూ ఈ బస్ సర్వీస్ ఉపయోగించుకుని తమ గమ్యాలను సురక్షితంగా చేరుకోవచ్చని తెలిపారు. అడగగానే బస్ సర్వీస్ ఏర్పాటు చేసిన పరకాల బస్ డిపో మేనేజర్ కి స్థానిక ప్రజల తరుపున ప్రత్యేక అభినందనలు తెలిపారు. అదేవిధంగా ఈ సర్వీస్ ను ప్రజల సౌకర్యార్థం ములుగు వరకు నడపాలని డిపో మేనేజర్ ని కోరారు. అనంతరం టికెట్ తీసుకుని బస్ లోని ప్రయాణించారు. ఈ కార్యక్రమంలో ఎంపీపీ, జడ్పీటీసి, మండల పార్టీ అధ్యక్షులు, పీఏసీఎస్ చైర్మన్, నాయకులు, కార్యకర్తలు, పాల్గొన్నారు.