న్యూఢిల్లీ, ఆంధ్రప్రభ : రష్యా-ఉక్రెయిన్ మ‌ధ్య యుద్ధం జ‌రుగుతున్న నేప‌థ్యంలో ఆ దేశంలో చిక్కుకున్న తెలంగాణ‌కు చెందిన విద్యార్థులను క్షేమంగా వెనక్కి తీసుకొచ్చేందుకు త‌గిన చర్యలు చేప‌ట్టాల‌ని టీఆర్ఎస్ ఎంపీ డాక్టర్ జి.రంజిత్‌రెడ్డి కేంద్రానికి విజ్ఞప్తి చేశారు. ఈ మేరకు ఆయన విదేశాంగ శాఖ మంత్రి ఎస్ జయ‌శంక‌ర్‌కు గురువారం లేఖ రాశారు. విద్యార్థులను రాష్ట్రానికి రప్పించేందుకు చర్యలు తీసుకోవాలని కోరారు. ఉక్రెయిన్ రాజధాని కీవ్ ఎయిర్పోర్టులో తెలంగాణ, ఆంధ్ర‌ప్ర‌దేశ్‌ రాష్ట్రాలకు చెందిన విద్యార్థులు చిక్కుకుపోయారని రంజిత్ రెడ్డి ఆందోళన వ్యక్తం చేశారు.
భారత్ వచ్చేందుకు విమానం టికెట్ బుక్ చేసుకున్న వారంతా ఎయిర్పోర్టుకు చేరుకున్నారు. అంతలోనే యుద్ధం ప్రారంభం కావడంతో ఉక్రెయిన్ తన గగన తలాన్ని మూసివేసింద‌ని, గగనతలాన్ని డేంజర్ జోన్గా ప్రకటించిందని లేఖలో పేర్కొన్నారు. ఎయిర్పోర్టు నుంచి బయటకు వెళ్లే దారులను కూడా మూసివేయడంతో విద్యార్థులను రాష్ట్రానికి తీసుకొచ్చే ప్ర‌య‌త్నాలు చేయాల‌ని ఎంపీ రంజిత్ రెడ్డి కేంద్ర మంత్రిని అభ్య‌ర్థించారు. తెలంగాణ విద్యార్థులందరినీ స్వరాష్ట్రానికి రప్పించాలని కోరారు.