హైద‌రాబాద్ – సంధ్య థియేటర్ తొక్కిసలాట కేసులో విచారణకు హీరో అర్జన్ నేడు హాజరయ్యారు.. జూబ్లీ హిల్స్ లోని ఆయన నివాసం నుంచి న్యాయవాదిలో కలసి చిక్కడపల్లి పోలీస్ స్టేషన్‌కు చేరుకున్నారు.. టాలీవుడ్ హీరో అల్లు అర్జున్ చిక్కడపల్లి పోలీస్ స్టేషన్లో విచారణకు హాజరవుతున్న నేపథ్యంలో చిక్కడపల్లి పోలీస్ స్టేషన్ వద్ద భారీగా మోహరించారు పోలీసులు. చిక్కడపల్లి పోలీస్ స్టేషన్ సమీపంలోని రోడ్లన్నీ బ్లాక్ చేసి.. పరిసర ప్రాంతాల్లో వాహనాల రాకపోకలను నిలిపివేశారు పోలీసులు.
పుష్ప మూవీ హీరో అల్లుఅర్జున్ కు చిక్కడపల్లి పోలీసులు సోమవారం నోటీసులు జారీ చేసిన విషయం తెలిసిందే. నేటి ఉదయం 11 గంటలకు దర్యాప్తు అధికారి చిక్కడపల్లి ఏసీపీ ముందు విచారణకు హాజరుకావాలంటూ నోటీస్ పంపారు. కేసు దర్యాప్తులో భాగంగా విచారించాల్సి ఉందని అందులో పేర్కొన్నారు.
కాగా, పుష్ప2 బెనిఫిట్ షో సందర్భంగా ఈనెల 4న సంధ్య థియేటర్ దగ్గర తొక్కిసలాట జరిగి రేవతి మరణించగా..ఆమె కుమారుడు శ్రీతేజ్ ప్రాణాపాయ స్థితిలో కొట్టుమిట్టాడుతున్నాడు. ఈ కేసులో అల్లు అర్జున్ సహా మొత్తం 18 మందిపై చిక్కడపల్లి పోలీసులు కేసు నమోదు చేసిన విషయం తెలిసిందే.ఈనెల 13వ తేదీన ఉదయం అల్లు అర్జున్ ను అరెస్టు చేశారు. నాంపల్లి కోర్టు రిమాండ్ విధించడంతో చంచల్ గూడ జైలుకు తరలించగా..హైకోర్టు మధ్యంతర బెయిల్ మంజూరు అవ్వడంతో 14వ తేదీన జైలు నుంచి విడుదలయ్యాడు.
కేసు దర్యాప్తులో ఉండగానే కోర్టు ఆదేశాలకు విరుద్ధంగా మూడు రోజుల కింద అల్లు అర్జున్ మీడియాతో మాట్లాడారు. పోలీసులు తనపై అవాస్తవాలు నమోదు చేశారంటూ అల్లు అర్జున్ ఆరోపించారు. ఈ తొక్కిసలాట ఘటనలో తన ప్రమేయం లేదని చెప్పే ప్రయత్నం చేశాడు. కేసుపై సమగ్ర దర్యాప్తు చేపట్టిన పోలీసులు అల్లు అర్జున్ కన్ ఫెషన్ స్టేట్ మెంట్ రికార్డు చేసేందుకు ప్రయత్నిస్తున్నారు. దీనిలో భాగంగానే మంగళవారం ఉదయం ఇన్వెస్టిగేషన్ ఆఫీసర్ ఎదుట హాజరవ్వాలని సోమవారం పోలీసులు నోటీసులు పంపించారు. ఈ నేపథ్యంలోనే అల్లు అర్జున్ విచారణకు హాజరయ్యారు.. ఎసిపి ర‌మేష్ కుమార్ , సెంట్రల్ జోన్ డిసిపి, సిఐ రాజు లు అల్లు అర్జున్ ను న్యాయ‌వాది అశోక్ రెడ్డి స‌మ‌క్షంలో విచారించ‌నున్నారు..