నవీపేట్, జనవరి 23 (ఆంధ్రప్రభ) : నవీపేట మండల కేంద్రంలోని కమలాపూర్ గ్రామంలో గురువారం సాహితీ ప్రైవేట్ స్కూల్ బస్సు బోల్తా పడింది. ఇద్దరు విద్యార్థులకు తీవ్రగాయాలయ్యాయి. వారిని నిజామాబాద్ ప్రైవేట్ ఆస్పత్రికి తీసుకెళ్లారు. నవీపేటలోని సాహితి ప్రైవేట్ స్కూలుకు చెందిన బస్సు నాడాపూర్‌ గ్రామం నుంచి తమ స్కూల్ విద్యార్థులను తీసుకుని నవీపేటకు వెళ్తుండగా కమలాపూర్ వద్ద ఈ ఘటన జరిగింది.
ప్రమాద సమయంలో బస్సులో సుమారు 30మంది విద్యార్థులున్నట్లు తెలుస్తోంది. ఘటనలో ఇద్దరు విద్యార్థులకు గాయాలయ్యాయి. మిగతా విద్యార్థులంతా సురక్షింగా బయటపడ్డారు. డ్రైవర్‌ నిర్లక్ష్యం వల్ల బస్సు బోల్తా పడింది. ఘటనలో బస్సు బోల్తా పడినప్పటికీ విద్యార్థులంతా సురక్షితంగా ఉండ‌డంతో సరిపోయింది… లేదంటే పెద్ద ప్రమాదమే జరిగేదని స్థానికులు అంటున్నారు.
బస్సు బోల్తా పడిన సమయంలో భయంతో పిల్లలు పెద్దగా కేకలు వేసి, ఏడుస్తూ వణికిపోయినట్లు స్థానికులు చెబుతున్నారు. ప్రైవేట్ బస్సు డ్రైవర్ల నిర్లక్ష్యం కారణంగా పిల్లలకు ప్రమాదం వాటిల్లకుండా ఉండాలంటే అధికారులు చర్యలు తీసుకోవాల్సిన అవసరం ఎంతైనా ఉందని విద్యార్థుల తల్లిదండ్రులు కోరుతున్నారు.