అవగాహన లేక‌నే వ్యాధి తీవ్ర‌త
మ‌హిళ‌లు నిర్ల‌క్ష్యం వీడాలి
అవగాహన ఉంటే కేన్సర్ను జ‌యించొచ్చు
క్రమశిక్షణ లేని జీవన విధాన‌మే కార‌ణం
లుంబినీ పార్క్ నుంచి కేన్సర్ అవేర్నెస్ వాక్‌
జెండా ఊపి క్యాంపెయిన్ స్టార్ట్ చేసిన మంత్రి దామోదర
తెలంగాణలో ఆరు కేన‌ర్స్‌ రీజ‌న‌ల్ సెంట‌ర్లు
ఏర్పాటుకు వేగ‌వంత‌మైన చ‌ర్య‌లు తీసుకుంటున్నాం
స్ప‌ష్టం చేసిన వైద్యారోగ్య శాఖ మంత్రి
ఆంధ్ర‌ప్ర‌భ స్మార్ట్‌, హైద‌రాబాద్‌:
కేన్సర్పై అవగాహన లేకపోవడంతో ఎంతో మంది ప్రాణాలు కోల్పోతున్నారని వైద్యారోగ్య శాఖ మంత్రి దామోదర రాజనర్సింహ అన్నారు. ప్రజలకు అవగాహన కల్పించి, ప్రాణ నష్టాన్ని నివారించాల్సిన బాధ్యత మనందరిపై ఉందన్నారు. నాన్ కమ్యునికబుల్ డిసీజ్‌లు అన్నింటిలోకెల్లా కేన్సర్ అత్యంత ప్రమాదకరమన్నారు. క్రమశిక్షణ లేని జీవన విధానం సహా అనేక అంశాలు ఈ వ్యాధి ప్రబలడానికి కారణమవుతున్నాయని తెలిపారు.
కేన్సర్పై అవ‌గాహ‌న‌కు ర్యాలీ..
ఎంఎన్‌జే కేన్సర్ హాస్పిటల్ ఆధ్వర్యంలో హైదరాబాద్‌లోని లుంబిని పార్క్ నుంచి ఎంఎన్ జే క్యాన్సర్ దవాఖాన వరకు నిర్వహించిన బ్రెస్ట్ క్యాన్సర్ అవేర్నెస్ క్యాంపెయిన్ అండ్ వాక్‌ను మంత్రి దామోదర ప్రారంభించారు. ఈ సందర్భంగా ఆయన మాట్లాడుతూ.. కేన్సర్ వంటి ప్రాణాంతక వ్యాధులను ఎదుర్కోవడానికి ఇలాంటి కార్యక్రమాలు ఉపయోగపడుతాయన్నారు. దేశంలో ఏటా 14 నుంచి 15 లక్షల కేన్సర్ కేసులు నమోదవుతుంటే.. తెలంగాణలో 50 నుంచి 60 వేల కేసులు ఉంటున్నాయని చెప్పారు.
పెరుగుతున్న బ్రెస్ట్ కేన్సర్ కేసులు..
మహిళల్లో ఎక్కువగా బ్రెస్ట్ కేన్సర్ కేసులు నమోదవుతున్నాయని మంత్రి దామోదర అన్నారు. మొత్తం విమెన్ కేన్సర్ బర్డెన్‌లో 14 శాతం ఈ కేసులే ఉంటున్నాయన్నారు. దీనిపై అవగాహన కల్పించి, స్క్రీనింగ్ చేస్తే ప్రాథమిక దశలోనే రోగ నిర్ధారణ చేయొచ్చని వెల్లడించారు. తద్వారా కేన్సర్ను పూర్తిగా నయం అయ్యేలా చికిత్స అందించొచ్చని చెప్పారు. ప్రతి మహిళ స్క్రీనింగ్ చేయించుకోవడానికి ముందుకు రావాలని, ప్రభుత్వం ఉచితంగా స్క్రీనింగ్, ట్రీట్‌మెంట్ అందిస్తోందన్నారు. ప్రతి గ్రామంలో మొబైల్ ల్యాబ్స్ ద్వారా ఉచితంగా స్క్రీనింగ్ చేయిస్తామని వెల్లడించారు.
రాష్ట్ర వ్యాప్తంగా ఆరు రీజ‌న‌ల్ సెంట‌ర్లు..
రాష్ట్రవ్యాప్తంగా ఆరు కేన్సర్ రీజినల్ సెంటర్లను ఏర్పాటు చేయబోతున్నామని మంత్రి దామోదర పేర్కొన్నారు. ఈ కేంద్రాల్లో డాక్టర్లు, పూర్తి స్థాయిలో ఎక్విప్‌మెంట్ తీసుకొస్తామని, వీటికి ఎంఎన్‌జే హాస్పిటల్ హబ్‌గా ఉంటుందని చెప్పారు. కేన్సర్ చికిత్స ఒక్క రోజులోనో, ఒక్క వారంలోనో అయ్యేది కాదని, నెలలు, సంవత్సరాల తరబడి సాగుతుందని తెలిపారు. అందువల్ల పేషెంట్లకు మానసిక, శారీక, ఆర్థిక మద్దతు చాలా అవసరమని, దాని కోసమే పాలియేటివ్ రిహాబిలిటేషన్ సెంటర్లను ఏర్పాటు చేస్తున్నామని వెల్లడించారు.