తెలంగాణలోని నల్గొండ జిల్లాలో ఘోరం జరిగింది. గట్టుప్పల్ గ్రామంలో పెళ్లి ఊరేగింపు జరుగుతుంటే వారిమీదికి కారు దూసుకెళ్లింది. ఈ ఘటనలో 13 ఏళ్ల బాలుడు అక్కడికక్కడే చనిపోయాడు. మరో నలుగురు తీవ్రంగా గాయపడ్డారు. యాదాద్రి భువనగిరి జిల్లా గట్టుప్పల్ సంస్థాన్‌ నారాయణపురానికి చెందిన మల్లేష్‌ అనే వ్యక్తి వివాహ వేడుకల సందర్భంగా బుధవారం రాత్రి ఈ ప్రమాదం జరిగింది. 29 సెకన్ల నిడివి గల వీడియోలో వరుడి స్నేహితులు ఏర్పాటు చేసిన రహదారిపై వ్యక్తులు DJలో డ్యాన్స్ చేస్తుంటే ఈ ఘటన జరిగినట్టు తెలుస్తోంది.
పెళ్లి ఊరేగింపు ముందు నడుస్తుండగా వరుడి కారు వారిని అనుసరించింది. అయితే ‘బారాత్’ను ఎంజాయ్ చేసేందుకు కారు డ్రైవర్ దిగాడు. దీంతో డ్రైవింగ్ తెలియక పోయినా వరుడు కారు నడిపేందుకు ట్రై చేశాడు. దీంతో కొద్దిసేపటికే కారు అదుపు తప్పి పెళ్లి ఊరేగింపుపైకి దూసుకెళ్లింది. ఈ ఘటనలో 13 ఏళ్ల దుబ్బాక సాయిచరణ్‌ చనిపోయాడు. ఈ ప్రమాదంలో వరుడితో పాటు మరో నలుగురికి కూడా గాయాలయ్యాయి. ఈ ప్రమాదం మొత్తం సీసీటీవీ కెమెరాలో రికార్డైంది. మరోవైపు మృతుడి తండ్రి పోలీసులకు ఫిర్యాదు చేయడంతో కేసు నమోదు చేశారు. తదుపరి విచారణ కొనసాగుతోంది.