ఆంధ్ర‌ప్ర‌భ స్మార్ట్‌, హైదరాబాద్ : హైదరాబాద్ ట్యాంక్ బండ్ స‌మీపాన హుస్సేన్ సాగర్లో గణేశ్ విగ్రహాల నిమజ్జనానికి అనుమతి లేద‌ని అధికారులు ప్ర‌క‌టించారు. హైకోర్టు ఆదేశాల మేరకు నిమజ్జనానికి అనుమతి లేదంటూ హైదరాబాద్ పోలీసు కమిషనర్, జీహెచ్ఎంసీ అధికారులు ట్యాంక్ బండ్ చుట్టూ బ్యానర్లు ఏర్పాటు చేశారు. వినాయక విగ్రహాలను హుస్సేన్ సాగర్లో వేయకుండా ట్యాంక్బండ్ చుట్టూ ఇనుప కంచెలతో భారీ గేట్లు ఏర్పాట్లు చేశారు. మ‌రో ప‌క్క నిమజ్జనానికి ముమ్మ‌ర ఏర్పాట్లు చేశారు.
ఓ లాయర్ పిటిష‌న్‌తో…
హుస్సేన్‌సాగర్‌లో వినాయక నిమజ్జనాలపై హైకోర్టులో విచారణ జ‌రుగుతుంది. హుస్సేన్‌సాగర్‌లో పీవోపీ విగ్రహాలు నిమజ్జనం చేయవద్దని గతంలో హైకోర్టు తీర్పు ఇచ్చినా, అమలు చేయట్లేదని లాయర్ వేణుమాధవ్‌ పిటిషన్‌ వేశారు. ఈ మేరకు హైకోర్టు సీజే ధర్మాసనం విచారణ చేపట్టనుంది. హుస్సేన్సాగర్ పరిరక్షణకు హైడ్రా బాధ్యత ఉంద‌ని, హైడ్రాను ప్ర‌తివాదిగా చేర్చాల‌ని ఆయ‌న ధ‌ర్మాసనానికి విజ్ఞప్తి చేశారు.