స్వతంత్ర్య భారత వజ్రోత్సవాల సందర్భంగా హైద‌రాబాద్‌ దోమలగూడలోని భారత్ స్కౌట్స్ అండ్ గైడ్స్ మోడల్ హై స్కూల్‌లో వన మహోత్సవం నిర్వ‌హించారు. ఈ సందర్భంగా ఎమ్మెల్సీ క‌ల్వ‌కుంట్ల కవిత మొక్క‌లు నాటారు. ఈ సందర్భంగా కవిత మీడియాతో మాట్లాడుతూ.. ఉమ్మడి నల్గొండ జిల్లా టీఆర్‌ఎస్‌కు కంచుకోట అని, మునుగోడు ఉపఎన్నిక ఎప్పుడొచ్చినా విజయం తమదేనని ధీమా వ్యక్తం చేశారు. గతంలో నల్లగొండ జిల్లాలో జరిగిన నాగార్జున సాగర్, హుజుర్ నగర్ ఉప ఎన్నికల్లో టీఆర్ఎస్ హేమహేమీలను ఓడగొట్టిన విషయాన్ని గుర్తు చేశారు.
మునుగోడులో తమ ఎమ్మెల్యే లేకున్నా అభివృద్ధి ఆగలేదని, కరోనా లాంటి సంక్షోభ సమయంలో కూడా తెలంగాణ వ్యాప్తంగా పెన్షల్లు , రైతుబంధు, ఇతర సంక్షేమ పథకాలు ఆగలేదని గుర్తుచేశారు. బిహార్‌ రాజకీయాలను యావత్‌ దేశం గమనిస్తోందన్నారు. బీజేపీ బ్యాక్ డోర్ రాజకీయాలు చేస్తుందన్నారు. ప్రజాస్వామ్యంలో ఇది మంచిది కాదు. మునుగోడు ఉప ఎన్నిక ఇలాంటి వాటికి సమాధానం చెప్తుందన్నారు. ఈ కార్య‌క్ర‌మంలో ఎమ్మెల్యే ముఠా గోపాల్ , డిప్యూటీ మేయర్ శ్రీలత రెడ్డి , తెలంగాణ ఫుడ్స్ చైర్మన్ మేడే రాజీవ్ సాగర్, బోరబండ కార్పొరేటర్ బాబా ఫసియుద్దిన్ పాల్గొన్నారు.