- దుకాణాల వైపు వేగంతో దూసుకెళ్లిన కారు
- ముగ్గురికి తీవ్ర గాయాలు తప్పిన పెను ప్రమాదం
- ప్రమాదం నుంచి బయటపడిన కారు ఓనర్, డ్రైవర్
జోగిపేట, జనవరి29 (ఆంధ్రప్రభ) : జోగిపేట హనుమాన్ చౌరస్తా వద్ద బుధవారం మధ్యాహ్నం కారు బీభత్సం సృష్టించింది. మద్యం మత్తులో అతివేగంగా డ్రైవర్ ఈసా కారు నడపడంతో అదుపుతప్పి రోడ్డు పక్కన ఉన్న దుకాణాల వైపు దూసుకెళ్లింది. ఈ సంఘటనలో రోడ్డుపై వస్తున్న ముగ్గురు వాహనదారులకు తీవ్ర గాయాలయ్యాయి. రెండు వాహనాలను అతివేగంగా ఢీకొట్టి రోడ్డు పక్కన ఉన్న టీడీపీ పార్టీ గద్దెకు కారు ఢీకొని ఆగిపోవడంతో పెద్ద ప్రమాదం తప్పింది.
జోగిపేట నుంచి అన్నాసాగర్ వైపు వెళ్తున్న ఆక్సన్ పల్లి గ్రామానికి చెందిన రాజు, కన్ సానిపల్లి నుంచి బైక్ పై గ్రామానికి చెందిన సంజీవులు, బాలయ్యలు ప్రభుత్వ ఆసుపత్రిలో చికిత్స కోసం వస్తున్న క్రమంలో వీరు ప్రయాణిస్తున్న బైక్ ను కారు ఢీకొట్టడంతో ఈ ప్రమాదంలో సంజీవులు బాలయ్యలకు తీవ్ర గాయాలయ్యాయి. ఇందులో సంజీవులు కాలుపై భాగంలో తీవ్ర గాయమైంది. చికిత్స నిమిత్తం వీరిని జోగిపేట ఆసుపత్రికి తరలించారు. ప్రమాదంలో గాయపడిన ముగ్గురికి వైద్యాధికారులు ఆసుపత్రిలో చికిత్సలు అందిస్తున్నారు.
అన్నాసాగర్ నుంచి జోగిపేట వైపు వస్తున్న కారు నిత్యం ప్రజలతో రద్దీగా ఉండే చౌరస్తాలో ఈ ప్రమాదం చోటుచేసుకుంది. బొడ్మట్ పల్లి గ్రామానికి చెందిన కాంగ్రెస్ నాయకులు మొగులయ్య వాహనం ఓనర్ అని పోలీసులు గుర్తించారు. కాగా ఈ ప్రమాదంలో కారు ఓనర్ మొగులయ్య, డ్రైవర్ ఈసా స్వల్ప గాయాలతో బయటపడ్డారు. ప్రమాదానికి కారణమైన వాహనాన్ని పోలీసులు అదుపులోకి తీసుకొని కేసు నమోదు చేసుకుని దర్యాప్తు చేస్తున్నారు. మద్యం మత్తులో డ్రైవర్ కారు నడపడంతోనే ఈ ప్రమాదం చోటు చేసుకుందని జోగిపేట ఏఎస్ఐ గౌస్ తెలిపారు.