మక్తల్, జులై 26 (ప్రభ న్యూస్) : జులై 26 కార్గిల్ విజయ్ దివస్ సందర్భంగా శ్రీ సరస్వతీ శిశుమందిర్ మక్తల్ పాఠశాలలో కార్గిల్ విజయ్ దివాస్ కార్యక్రమాన్ని ఘనంగా నిర్వహించారు. జవానుల వేషధారణతో అమరుల నివాళి స్థూపాన్ని విద్యార్థులచే ఏర్పాటు చేయించారు. ఈ కార్యక్రమాన్ని ఉద్దేశించి పాఠశాల ప్రధానాచార్యులు బి.కుర్మయ్య మాట్లాడుతూ… 1999లో భారతదేశ భూభాగాన్ని సంరక్షించడం కోసం ప్రాణత్యాగం చేసిన 527మంది అమరజవానుల త్యాగాన్ని స్మరించుకునే సందర్భమే కార్గిల్ విజయ్ దివస్ అని తెలిపారు.
జమ్మూ కాశ్మీర్ ను ఆక్రమించుకోవడానికి ప్రయత్నం చేసిన పాకిస్థాన్ కుటిల ప్రయత్నాన్ని తిప్పికొట్టిన భారత జవానుల పోరాట పటిమను, సామర్థ్యాన్ని, సమర్పణ భావాన్ని విద్యార్థులు ఆదర్శంగా తీసుకోవాలని ఆయన సూచించారు.అనంతరం ప్రాణత్యాగం చేసిన అమర జవానులను స్మరించుకుంటూ పాఠశాల ఆచార్యులు విద్యార్థులు ఒక నిముషం పాటు మౌనం పాటించారు. ఈ కార్యక్రమంలో పాఠశాల సిబ్బంది, విద్యార్థులు, ఆచార్య, మాతాజీలు పాల్గొన్నారు.
