అచ్చంపేట, ఏప్రిల్ 5 (ప్రభ న్యూస్) : భారతదేశంలో హరిత విప్లవం, భారత వ్యవసాయాన్ని ఆధునీకరించడంలో బాబు జగ్జీవన్ రామ్ అందించిన సహకారం చరిత్ర‌లో ఎప్పటికీ నిలిచిపోతుందని అచ్చంపేట ఎమ్మెల్యే డాక్టర్ చిక్కుడు వంశీకృష్ణ అన్నారు. శుక్రవారం అచ్చంపేట పట్టణంలోని తన స్వగృహంలో బాబు జగ్జీవన్ రామ్ జయంతి సందర్భంగా ఆ మహానీయుడికి పూలమాలవేసి ఘనంగా నివాళులర్పించారు. ఈ సందర్భంగా ఎమ్మెల్యే వంశీకృష్ణ మాట్లాడుతూ… కేంద్ర వ్యవసాయ మంత్రిగా తన రెండు పదవీకాలాల్లో 1974 కరువు సమయంలో అదనపు మంత్రిత్వ శాఖను నిర్వహించి ఆహార సంక్షోభాన్ని నివారించటానికి ప్రత్యేకంగా కృషి చేశారన్నారు.
1946లో జవహర్‌లాల్ నెహ్రూ తాత్కాలిక ప్రభుత్వంలో అతి పిన్న వయస్కుడైన మంత్రిగా బాధ్యతలు చేపట్టి భారతదేశపు మొట్టమొదటి క్యాబినెట్ కార్మిక మంత్రిగా, భారత రాజ్యాంగ పరిషత్ సభ్యుడిగా తన సేవలను అందించారని తెలిపారు. భారత జాతీయ కాంగ్రెస్ సభ్యుడిగా నలభై సంవత్సరాలకు పైగా వివిధ శాఖల క్యాబినెట్ మంత్రిగా తనదైన శైలిలో సేవలందించారన్నారు. మరీ ముఖ్యంగా అతను 1971 ఇండో-పాక్ యుద్ధం జరిగిన సమయంలో భారత రక్షణ మంత్రిగా విధులు నిర్వహించిన ఫలితంగా బంగ్లాదేశ్ ఏర్పాటుకు సుగమం ఏర్పడిందన్నారు. అతని మరణం తరువాత, స్వతంత్ర భారతదేశం మొట్టమొదటి క్యాబినెట్‌లో చివరిగా జీవించి ఉన్న చివరి తాత్కాలిక మంత్రి, చివరి సభ్యుడు అని అన్నారు. ఈ కార్యక్రమంలో స్థానిక నాయకులు, కౌన్సిలర్లు, తదితరులు పాల్గొన్నారు.