- నిబంధ‌న‌లు విడుద‌ల చేసిన ఎన్టీఎ
- 30వ తేదీ వ‌ర‌కు కొన‌సాగ‌నున్న పరీక్షలు
- ఐఐటీ, ఇంజినీరింగ్ కాలేజీల్లో ప్ర‌వేశానికి ఎగ్జామ్స్
హైద‌రాబాద్, ఆంధ్ర‌ప్ర‌భ : జేఈఈ మెయిన్స్ – 2025 సెషన్ – 1 పరీక్షలు రేపటి (బుధ‌వారం) నుంచి ప్రారంభం కానున్నాయి. పరీక్షల నిర్వహణకు ఎన్టీఏ అన్ని ఏర్పాట్లను పూర్తి చేసింది. ఐఐటీలతో పాటు పలు ప్రతిష్ఠాత్మక ఇంజినీరింగ్ కాలేజీల్లో ప్రవేశం కోసం జేఈఈ పరీక్షలు నిర్వహిస్తారు. ఈ నెల 22, 23, 24, 28, 29, 30 తేదీల్లో మెయిన్స్ పరీక్షలు జరగనున్నాయి. పరీక్ష రాసే విద్యార్థులు అధికారిక వెబ్ సైట్ నుంచి హాల్‌టికెట్ల‌ను డౌన్ లోడ్ చేసుకోవచ్చు.
అభ్య‌ర్ధుల‌కు సూచ‌న‌లు..
ఎగ్జామ్ హాల్లోకి విద్యార్థులు కచ్చితంగా అడ్మిట్ కార్డును తీసుకెళ్లాలి. లేకపోతే పరీక్ష హాల్లోకి అనుమతించరు. ఫొటోతో కూడిన గుర్తింపు కార్డును చూపించాలి. ఆధార్, రేషన్, పాస్ పోర్టు, డ్రైవింగ్ లైసెన్స్, పాన్ కార్డు… వీటిలో ఏదైనా ఒక గుర్తింపు కార్డును తీసుకుని వెళ్లాలి. ఇక.. ఆన్ లైన్‌లో దరఖాస్తు చేసినప్పుడు అప్ లోడ్ చేసిన పాస్ పోర్టు సైజు ఫొటోను తీసుకెళ్లాలి.
దివ్యాంగులైన విద్యార్థులు తమ వెంట మెడికల్ సర్టిఫికెట్లు తీసుకెళ్లాలి. నగలు, మెటాలిక్ వస్తువులను పరీక్ష కేంద్రంలోకి అనుమతించరు. బ్యాగ్, పర్సు, ప్రింటెడ్ మెటీరియల్, మొబైల్ ఫోన్లు, కాలిక్యులేటర్, జామెట్రీ బాక్స్ వంటివి కూడా అనుమ‌తించ‌బోమ‌ని అధికారులు తెలిపారు.