నిజామాబాద్ ఆసుప‌త్రిలో అమానుషం..

స్ట్రెచ‌ర్ అందుబాటులో లేక‌పోవ‌డంతో అత‌డి స‌హాయ‌కులు రోగి కాళ్లు ప‌ట్టుకుని ఈడ్చుకుంటూ వెళ్లారు.ఈ అమానుష సంఘ‌ట‌న నిజామాబాద్ ప్రభుత్వ ఆస్పత్రిలో చోటుచేసకుంది. బయటి నుంచి లిఫ్ట్ వరకు కాళ్లు పట్టుకుని లాక్కెళ్లారు. అయితే రోగిని ఆస్పత్రిలోకి తీసుకెళ్లేందుకు ఆస్పత్రి సిబ్బంది సహకరించలేదనే ఆరోపణలు వినిపిస్తున్నాయి. కాగా రెండు వారాల క్రితం ఈ ఘటన చోటు చేసుకుంది. ఇందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. దీంతో ఆస్పత్రి సిబ్బంది తీరుపై జనాలు ఆగ్రహం వ్యక్తం చేస్తున్నారు. అయితే ఈ పరిణామాలపై నిజామాబాద్ ప్రభుత్వ ఆస్పత్రి సూపరింటెండెంట్‌ ప్రతిమారాజ్‌ స్పందించారు. ఆస్పత్రికి వచ్చిన రోగుల పట్ల సిబ్బంది నిర్లక్ష్యంగా వ్యవహరిస్తున్నారని వచ్చిన ఆరోపణలను ఖండించారు. ఆ రోగిని మార్చి 31 ఆస్పత్రికి తీసుకొచ్చారని.. లిఫ్ట్ వచ్చిందనే తొందరలో అతడి సహాయకులే కాళ్లు పట్టుకుని లాక్కెళ్లరని చెప్పారు. అది గమనించిన సిబ్బంది వాళ్లను వారించి వీల్‌ఛైర్‌లో తీసుకెళ్లారని స్పష్టం చేశారు.ఇందులో సిబ్బంది నిర్లక్ష్యమేమి లేదని తెలిపారు. ఈ ఘ‌ట‌న‌పై వ‌స్తున్న వార్త‌ల‌ని ఆమె తీవ్రంగా ఖండించారు.