ఇండోర్ : తెలంగాణ ముఖ్యమంత్రి రేవంత్ రెడ్డి కేంద్రంలో అధికారంలో ఉన్న బీజేపీపై తీవ్ర విమర్శలు చేశారు. బీజేపీ డాక్టర్ అంబేద్కర్, భారత రాజ్యాంగం, రిజర్వేషన్ వ్యవస్థను అపహాస్యం చేస్తోందని ఆరోపించారు. మధ్యప్రదేశ్‌లోని మౌహ్ పట్టణం, భారత రాజ్యాంగ నిర్మాత డాక్టర్ అంబేద్కర్ జన్మస్థలంలో, కాంగ్రెస్ పార్టీ నేడు నిర్వహించిన జై బాపు-జై భీం-జై రాజ్యాంగం సభలో ఆయన మాట్లాడుతూ… రాజ్యాంగాన్ని మార్చాలనే బీజేపీ దాగిన అజెండా దేశానికి మంచిది కాదని చెప్పారు. యూనివర్శిటీ గ్రాంట్స్ కమిషన్ డ్రాఫ్ట్ నిబంధనలను రాజ్యాంగంపై దాడిగా అభివర్ణించారు. ఈ నిబంధనలను వెంటనే ఉపసంహరించుకోవాలని ఆయన డిమాండ్ చేశారు.
“రాజ్యాంగాన్ని మార్చే ప్రయత్నాలు జరుగుతున్నాయి. వాళ్లు (బీజేపీ) ఎలాంటి శక్తితో ఆ ప్రయత్నాలు చేస్తే, ఆ శక్తితోనే రాజ్యాంగాన్ని రక్షించడానికి ప్రయత్నిస్తాం. అందుకే మేము ఇక్కడ మౌహ్‌లో సమావేశమయ్యాం” అని రేవంత్ రెడ్డి అన్నారు. ఈ కార్య‌క్ర‌మంలో ఎఐసిసి అధ్య‌క్షుడు మ‌ల్లిఖార్జున ఖ‌ర్గే, కీల‌క నేత రాహుల్ గాంధీ, త‌దిత‌రులు పాల్గొన్నారు..