సుల్తానాబాద్‌, జనవరి 29 (ఆంధ్రప్రభ): పుణ్య క్షేత్రానికి వెళ్తున్న ఆ కుటుంబాన్ని మృత్యువు వెంటాడింది. కాళేశ్వరం దర్శనం కోసం బయల్దేరిన వారిలో దంపతులు రోడ్డు ప్రమాదంలో మృతిచెందగా, మరో ఐదుగురికి తీవ్ర గాయాలయ్యాయి.
సుల్తానాబాద్‌ మండలం కాట్నపల్లి గ్రామం వద్ద ఘోర రోడ్డు ప్రమాదం చోటు చేసుకున్న విషాద ఘటన వివరాలిలా ఉన్నాయి.. సిద్దిపేట నుంచి కాళేశ్వరం పుణ్యక్షేత్రానికి కారులో బయలుదేరిన వారు సుల్తానాబాద్‌ మండలం కాట్నపల్లికి చేరుకోగానే కారు అదుపు తప్పి రోడ్డు పక్కన ఉన్న కల్వర్టును ఢీకొట్టింది. ఈ ప్రమాదంలో కారు ముందుభాగం నుజ్జునుజ్జయి అందులో ప్రయాణిస్తున్న సిద్దిపేటకు చెందిన ఆకుల కనకయ్య, తార అనే దంపతులు అక్కడికక్కడే మృతిచెందారు.
కారులో ప్రయాణిస్తున్న మరో ఐదుగురు తీవ్ర గాయాలపాలయ్యారు. సుల్తానాబాద్‌ పోలీసులు సంఘటన స్థలానికి చేరుకొని క్షతగాత్రులను కరీంనగర్‌ ఆస్పత్రికి తరలించారు. ఇద్దరు మరణించగా, ఐదుగురు కరీంనగర్‌ ఆస్పత్రిలో చికిత్స పొందుతున్నారు. దైవ దర్శనానికి వెళ్తున్న వారిలో ఇద్దరిని కారు ప్రమాదం బలిగొనడం, మరికొందరు తీవ్రగాయాల పాలై ఆస్పత్రిలో ప్రాణాపాయ స్థితిలో కొట్టుమిట్టాడుతుండడంతో వారి కుటుంబాన్ని తీవ్ర విషాదం నింపింది.