ఆటోని ఢీ కొన్న కారు..ముగ్గురు మృతి

కారు ఆటోని ఢీకొంది.ఈ ఘటనలో ముగ్గురు మరణించారు. ఈ సంఘటన జగిత్యాల జిల్లా వెల్గటూరు మండలంలో జరిగింది. ఈ ఘటనలో మరో ఇద్దరికి తీవ్రగాయాలయ్యాయి. మందమర్రికి చెందిన బొడ్డు సుధ(38) ,ఆమె కూతురు బొడ్డు ప్రిన్సిత(15), రేణికుంట మిల్కారాణి(15) ధర్మపురి మండలం ధర్మారంలోని చర్చికి ఆటోలో బయలు దేరారు. మార్గమధ్యలో మంచికట్ల పుష్ప అనే ప్రయాణికురాలిని ఎక్కించుకున్నారు. రాయపట్నం రాష్ట్ర రహదారిపై కిషన్ రావు పేట స్టేజి వద్ద ఎదురుగా వచ్చిన కారు ఆటోను ఢీకొట్టింది. ప్రమాదంలో సుధ, ప్రిన్సిత, మిల్కారాణి అక్కడికక్కడే మృతి చెందగా ఆటో డ్రైవర్‌ ప్రభాకర్‌, ప్రయాణికురాలు పుష్పకు తీవ్రగాయాలయ్యాయి. వీరిని చికిత్స నిమిత్తం హుటాహుటినా కరీంనగర్‌ ఆస్పత్రికి తరలించారు. పోలీసులు కేసు నమోదు చేసుకుని దర్యాప్తు చేస్తున్నారు.