రంగారెడ్డి జిల్లా చేవెళ్ల మండలం ఆలూర్ స్టేజ్ వద్ద నేడు ఘోర రోడ్డు ప్రమాదo చోట చేసుకుంది… అదుపు తప్పిన లారీ ఇక్కడ కూరగాయల అమ్మేవాళ్లపైకి దూసుకెళ్లింది. ప్రాథమిక సమాచారం ప్రకారం నలుగురు మృతి చెందారు.. మృతుల సంఖ్య మరింత పెరిగే అవకాశం ఉందని భయపడుతున్నారు. అలాగే ఈ ప్రమాదంలో మరో 15 మంది వరకు గాయపడ్డారు.. గాయపడిన వారిని చికిత్స కోసం తరలించారు..
హైదరాబాద్ – బీజాపుర్ రహదారి పక్కన దాదాపు 50 మంది కూరగాయలు విక్రయిస్తుండగా.. వారి పైకి లారీ దూసుకెళ్లడంతో ఈ దుర్ఘటన చోటుచేసుకుంది. దూసుకొస్తున్న లారీని చూసి అక్కడి జనమంతా భయంతో పరుగులు తీశారు. వ్యాపారులపైకి దూసుకెళ్లిన లారీ చెట్టును ఢీకొట్టి ఆగింది. లారీ డ్రైవర్ మాత్రం క్యాబిన్లో ఇరుక్కుపోవడంతో అతడిని బయటకు తీసి ఆస్పత్రికి తరలించారు. హైదరాబాద్ లో అన్లోడ్ చేసి తిరిగి వికారాబాద్ వెళ్తున్న క్రమంలో లారీ అదుపుతప్పడంతో ఈ ఘటనకు చోటుచేసుకున్నట్లు పోలీసులు పేర్కొన్నారు.
రేవంత్ దిగ్భ్రాంతి..
చిరు వ్యాపారులపైకి లారీ దూసుకెళ్లిన ఘటనపై సీఎం రేవంత్ రెడ్డి తీవ్ర దిగ్భ్రాంతి వ్యక్తం చేశారు.. మృతుల కుటుంబాలకు సంతాపం తెలియజేశారు. ఈ ప్రమాదంలో గాయపడిన వారికి మెరుగైన వైద్య సదుపాయం అందించాలని అధికారులను ఆదేశించారు