ఆదిలాబాద్, ఆంధ్రప్రభ బ్యూరో : పోలీస్ శాఖలో పుష్కర కాలం పాటు సేవలందించి .. ఎన్నో మైలురాళ్లను అధిగమించిన పోలీసు డాగ్‌కు అరుదైన గౌర‌వం ల‌భించింది. ఆదిలాబాద్ పోలీస్ శాఖలో విశేష సేవలందించి పోలీసుల ప్రతిష్టను పెంచిన తార అనే జాగిలానికి జిల్లా ఎస్పీ సెల్యూట్ కొట్టి పూల మాల‌లు వేసి శాలువాలతో ఘనంగా సత్కరించారు. పుష్కర కాలం పాటు సేవ‌లందించిన తార (జాగిలం) ఎన్నో సవాళ్లతో కూడిన కేసులను ఛేదించ‌డంలో స‌హ‌క‌రించింద‌ని ఎస్పీ గౌస్ అలం తెలిపారు.
పేలుడు సామాగ్రి , మందు పాతరలను పసిగట్టడంలో నేర్పరి అయిన తార పోలీస్ శాఖలో 9 ఏళ్లకే రిటైర్మెంట్ కావాల్సి ఉండగా, ఉత్తమ ఫలితాలు రాబట్టినందుకు మూడేళ్లు పదవీ విరమణ గడువు పెంచామని చెప్పారు. ఈ సంద‌ర్భంగా తార‌కు పదవీ విరమణ పేరిట ఘనంగా వీడ్కోలు పలకడం, ఆ జాగిలం సెల్యూట్ చేసి ఎస్పీ గౌరవ వందనం స్వీకరించి హైదరాబాద్ కు చెందిన ఐఐటీఏ హ్యాండ్లర్ ఎల్ .సోమన్నకు అప్పగించారు.