జన్నారం, జూన్ 3 (ప్రభ న్యూస్): మంచిర్యాల జిల్లా కవ్వాల పులుల అభయాణంలోని తాళ్లపేట రేంజ్ దమ్మన్నపేట అటవీ బీట్ ఆఫీసర్ అల్గం సాయికుమార్, వాచర్ శ్రీనివాస్ పై ఆదివారం రాత్రి తాగిన మైకంలో కొందరు యువకులు దాడి చేయగా, ఆ బీట్ ఆఫీసర్ కు, వాచర్ కు తీవ్ర గాయాలయ్యాయి. బీట్ ఆఫీసర్, వాచర్ తపాలాపూర్ ఫారెస్ట్ చెక్ పోస్ట్ పై డ్యూటీలో ఉండగా… ఆదివారం రాత్రి 11గంటలకు, అకస్మాత్తుగా వచ్చిన కొందరు యువకులు తాను ఫారెస్ట్ బీట్ ఆఫీసర్ అని చెప్పినప్పటికీ, వినకుండా చేతికి ఉన్న కడెంతో శ్రావణ్ దాడి చేసి తీవ్రంగా కొట్టారని ఆయన తెలిపారు.
తనతోపాటు వాచర్ ను కొట్టారని ఆయన చెప్పారు. దాడి చేసిన వారిలో ఇద్దరిని గుర్తించామని, ఆ ఇద్దరు దండేపల్లి మండలంలోని మేదిరిపేటకు చెందిన ఆడెపు శ్రవణ్, తీగల ఉదయ్ అని ఆయన చెప్పారు. తీవ్రగాయాల పాలైన బీట్ ఆఫీసర్, వాచర్ లు ప్రస్తుతం లక్సెట్టిపేట ప్రభుత్వ ఆసుపత్రిలో చికిత్స పొందుతున్నారు. ఈ వ్యవహారమై జన్నారం పోలీస్ స్టేషన్ లో ఫిర్యాదు ఇచ్చినట్లు రేంజ్ ఆఫీసర్ సుష్మారావు సోమవారం తెలిపారు. ఆ బీట్ ఆఫీసర్ ఇచ్చిన ఫిర్యాదు మేరకు శ్రవణ్, ఉదయ్, మరికొందరిపై కేసు నమోదు చేసి, దర్యాప్తు చేస్తున్నట్లు స్థానిక ఎస్సై గుండేటి రాజవర్ధన్ తెలిపారు.