సన్న వడ్లకు మండలంలో రూ.58,83,600
కమాన్‌ పూర్‌, నవంబర్‌ 28 (ఆంధ్రప్రభ): రాష్ట్ర ప్రభుత్వం సన్న వడ్లకు అందిస్తున్న క్వింటాల్‌కు రూ. 500 బోనస్ చెల్లింపులో ఓ రైతుకు ఏకంగా రూ.3లక్షల బోనస్ అందింది. పెద్దపల్లి జిల్లా కమాన్‌ పూర్‌ మండల కేంద్రానికి చెందిన కౌలు రైతు ఉడ్నాల సూర్యంకు తాను కౌలు చేసిన 27ఎకరాల్లో పండించిన సన్న వడ్లకు ఇప్పటివరకు 2,26,000 బోనస్ బ్యాంకులో జమ అయ్యాయి. మరో లక్ష రూపాయలు రైతు బ్యాంకు ఖాతాలో సన్న వడ్లకు బోనస్‌గా పడనున్నాయి.
సూర్యం ఇప్పటివరకు 452 క్వింటాళ్ల సన్న వడ్లు కొనుగోలు కేంద్రాల్లో విక్రయించాడు. తనకు రూ.3లక్షల పైచిలుకు బోనస్ వచ్చినందుకు హర్షం వ్యక్తం చేశాడు. కాగా కమాన్‌ పూర్‌ మండలంలోని 157 మంది రైతులకు సన్న వడ్లు విక్రయించినందుకు 58,83,600 రూపాయలు జమ అయినట్లు వ్యవసాయ అధికారి గిరి రామకృష్ణ తెలిపారు. వరి ధాన్యాన్ని తాలుతప్ప లేకుండా తీసుకువచ్చి బోనస్ తీసుకోవాలని వ్యవసాయ అధికారి గిరి రామకృష్ణ కోరారు.