ఉత్త‌రాది నుంచి వాప‌స్ వ‌స్తున్న నైరుతి రుతుప‌వ‌నాల ఎఫెక్ట్ తెలంగాణ‌పై ఉంటుంద‌ని వాతావరణ శాఖ తెలిపింది. దీనికి తోడు బంగాళాఖాతంలో ఏర్ప‌డ్డ ఆవ‌ర్త‌నం కార‌ణంగా కూడా వాతావ‌ర‌ణంలో మార్పులుంటాయి. దీంతో ఈ నెల 30వ తేదీ దాకా రాష్ట్రంలోని పలు జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్ల‌డించింది. ఆ త‌ర్వాత ఒక‌టి రెండు రోజులు పొడి వాతావ‌ర‌ణం ఉంటుంద‌ని, ఆ త‌ర్వాత మ‌ళ్లీ వర్షాలు కురిసే చాన్స్ ఉందని అధికారులు తెలిపారు.
రేపు ఏ జిల్లాల్లో వ‌ర్షాలుంటాయంటే..
కొమురంభీమ్‌ ఆసిఫాబాద్‌, మంచిర్యాల, జగిత్యాల, పెద్దపల్లి, జయశంకర్‌ భూపాల‌పల్లి, ములుగు, భద్రాద్రి కొత్తగూడెం, ఖమ్మం, నల్లగొండ, సూర్యాపేట, మహబూబాబాద్‌, వరంగల్‌, హన్మకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్‌-మల్కాజిగిరి, వికారాబాద్‌, సంగారెడ్డి, మెదక్‌, కామారెడ్డి, మహబూబ్‌నగర్‌ జిల్లాల్లోని పలు ప్రాంతాల్లో రేపు (బుధ‌వారం) ఉరుములు, మెరుపులతో కూడిన భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరిక జారీ చేసింది.
దంచికొట్టిన వాన
గడిచిన 24 గంటల్లో హైదరాబాద్, యాదాద్రి భువనగిరి, మేడ్చల్‌-మల్కాజిగిరి, కొమురంభీమ్‌ ఆసిఫాబాద్‌, నిర్మల్‌, నల్లగొండ తదితర జిల్లాల్లో భారీ వర్షాలు కురిసినట్లు అధికారులు తెలిపారు. బంగాళాఖాతంలో అక్టోబర్‌ 1వ తేదీన మరో అల్పపీడనం ఏర్పడే అవకాశం ఉందని, దీంతో మ‌ళ్లీ వాన‌ల ఎఫెక్ట్ ఉంటుంద‌ని హెచ్చ‌రిస్తున్నారు.