వాట్సాప్‌లో కేటుగాళ్లు ఫేక్ వార్తలను పుట్టించడం కొత్తేమీ కాదు. ఎన్ని చర్యలు తీసుకున్నా కొన్నిసార్లు నిజమనిపించేలా కొందరు వార్తలు పుట్టిస్తున్నారు. ఈ నేపథ్యంలో దేశంలో ఒకవైపు కరోనా పాజిటివ్ కేసులు పెరుగుతున్నా ప్రజలు మాస్క్ ధరించడం, శానిటైజర్ వినియోగించడం లాంటివి మరిచారు. దీంతో ఇదే అదనుగా ఏపీ పోలీసుల పేరుతో నకిలీ వార్తను సృష్టించారు. మంగళవారం నుంచి మాస్క్ ధరించడం తప్పనిసరి అని ఆ వార్త సారాంశం.
మాస్కులు ధరించని పక్షంలో భారీ జరిమానా కట్టాల్సి ఉంటుందని.. గ్రామాల్లో అయితే రూ.500, పట్టణాలలో అయితే రూ.1000 జరిమానా విధించేందుకు పోలీసులు సిద్ధమవుతున్నారని అందులో పేర్కొన్నారు. కాగా ఈ వార్తపై స్పందించిన పోలీసులు ఇది ఫేక్ వార్త అని నిర్ధారించారు. మాస్క్ ధరించడంపై తాము ఎలాంటి ఉత్తర్వులు ఇవ్వలేదని వారు స్పష్టం చేశారు. కానీ ప్రభుత్వం చెప్పినా.. చెప్పకపోయినా మన వంతుగా మాస్క్ ధరించి కరోనా నివారణకు కృషి చేద్దాం.