వర్రకుంటను మొత్తానికే మింగేశారు. విల్లాల నిర్మాణం కోసం చెరువునే లేకుండా చేశారు. కాకతీయుల నాటి గొలుసుకట్టు చెరువులను కొంతమంది లీడర్లు, అధికార బీఆర్ఎస్ పార్టీ ప్రజాప్రతినిధులు చెరబడుతున్నారు. హైదరాబాద్తోపాటు.. చట్టుపక్కల డెవలప్ అవుతున్న సిటీని ఆసరాగా చేసుకుని విల్లాలు నిర్మించేందుకు ఏకంగా హెచ్ఎండీఏ నుంచి పర్మిషన్ కూడా తెచ్చుకున్నారు. దీనికి గ్రేటర్ ఇన్ఫా పేరుతో విల్లాల నిర్మాణం కూడా జరుగుతోంది. దీంతో నిజాంపేట్ కార్పొరేషన్ బాచుపల్లి పరిధిలోని ఎల్లమ్మ చెరువు నుంచి బొల్లారం మున్సిపాలిటీ వర్రకుంటకు నీరు రాకుండా పోతోంది. తాగునీటి వనరులను నాశనం చేస్తూ బడా కాంట్రాక్టర్లు, కొంతమంది బీఆర్ఎస్ లీడర్లు ఈ దందాకు పూనుకున్నట్టు స్పష్టమవుతోంది.
ఇట్లా ఓ చెరువును లేపేసి ఆ ప్లేసులో విల్లాలు నిర్మిస్తుంటే.. దీనికి ప్రభుత్వం కూడా అనుమతి ఇవ్వడం వెనకాల ఎవరి హస్తం ఉందన్న అనుమానాలు వ్యక్తం అవుతున్నాయి. చెరువులను కాపాడేలా సీఎం కేసీఆర్ సీరియస్గా చర్యలు తీసుకుంటుంటే.. కొంతమంది కబ్జాకోరులు ఇలా చెరువులను చెరబడుతూ భవిష్యత్ తరాలకు నీటి వనరులు లేకుండా చేస్తున్నారు. అందులో మున్సిపల్ శాఖ మంత్రిగా కేటీఆర్ హయాంలో ఇదంతా జరగడాన్ని కొంతమంది అభిమానులు జీర్ణించుకోలేకపోతున్నారు. దీనిపై మంత్రి కేటీఆర్ సీరియస్ యాక్షన్ తీసుకుని కబ్జాకు పాల్పడ్డ పార్టీ లీడర్లపై వేటు వేయాలని, ఎంతటి వారైనా సరే.. కఠిన నిర్ణయాలు తీసకుంటేనే ఇలాంటి కబ్జాలు జరగవని స్థానికులు కోరుతున్నారు. లేకుంటే ఇది పార్టీకి, సీఎం కేసీఆర్కు, మంత్రి కేటీఆర్కు మాయని మచ్చగా మిగులుతుందని, దీనిపై ప్రతిపక్షాలు ఆందోళన చేపట్టకముందే చర్యలు తీసుకోవాలని కోరుతున్నారు.
