ట్విట్టర్ సిబ్బంది అవగాహనరాహిత్యం వల్ల ఏఎన్ఐ (ఆసియా ప్రీమియర్ న్యూస్ ఏజెన్సీ, ఇండియా న్యూస్) మీడియా సంస్థ లాక్ అయ్యింది. ఈ విషయాన్ని ANI ఎడిటర్ స్మితా ప్రకాష్ శనివారం తెలిపారు. ‘‘మైక్రోబ్లాగింగ్ సైట్‌ను ఉపయోగించడానికి మీ కనీస వయస్సు సరిపోలడం లేదు.. కాబట్టి, ట్విట్టర్ ఆసియా న్యూస్ ఇంటర్నేషనల్ (ANI) ఖాతాను లాక్ చేసింది’’ అని ట్విట్టర్ వెల్లడించింది. దీంతో ఆ వార్తా సంస్థకు చెందిన ట్విట్టర్ హ్యాండిల్ ప్రస్తుతం యాక్టివ్లో లేదు అనే మెస్సేజ్ వస్తున్నట్టు ఎడిటర్ వివరించారు. అంతేకాకుండా ANI హ్యాండిల్ లాక్ అయినట్టు తెలిపే ట్విట్టర్ ఇ–మెయిల్ చిత్రాన్ని స్మితా ప్రకాష్ ట్వీట్ చేశారు.
‘‘ట్విటర్ ఖాతాను ఓపెన్ చేయడానికి మీకు కనీసం 13 సంవత్సరాలు ఉండాలి. మీరు ఈ వయస్సు అవసరాలకు అనుగుణంగా లేరని Twitter నిర్ధారించింది, కాబట్టి మీ ఖాతా లాక్ చేశాం. అందుకనే Twitter నుండి ఈ సంస్థ తొలగిస్తున్నాం’’ అని మరో ఇమెయిల్ పంపించినట్టు ఎడిటర్ స్మితా ప్రకాశ్ తెలిపారు..
ఇక.. ఏఎన్ఐ వార్త సంస్థ.. దక్షిణాసియాలో ప్రీమియర్ మల్టీమీడియా వార్తా సంస్థగా ఉంది. భారతదేశంతోపాటు, దక్షిణాసియా, ప్రపంచవ్యాప్తంగా 100 కంటే ఎక్కువ బ్యూరోలను కలిగి ఉంది. అయితే.. ఎలోన్ మస్క్ సోషల్ మీడియా సంస్థ ట్విట్టర్ని స్వాధీనం చేసుకున్నప్పటి నుండి, దాని సిబ్బందిని తగ్గించారు. అప్పటి నుంచి వినియోగదారులు ఇట్లాంటి ఎన్నో ఇబ్బందులకు గురవుతున్నారు.
