తెలంగాణలోని నిరుద్యోగులకు శుభవార్త. రాష్ట్రంలో కొలువుల జాతర మొదలైంది. నిన్న దాదాపు 16 వేల పోలీసు కానిస్టేబుల్ ఉద్యోగాలకు నోటిఫికేషన్ విడుదల కాగా.. తాజాగా గ్రూప్ – 1 నోటిఫికేషన్ విడుదలకు రంగం సిద్ధమైంది. నేడో, రేపో టీఎస్పీఎస్సీ గ్రూప్-1కు సంబంధించిన నోటిఫికేషన్ ప్రకటన జారీ చేయనుంది. మొత్తం 503 పోస్టులతో గ్రూప్-1 నోటిఫికేషన్ జారీకి గత కొన్నాళ్లుగా కసరత్తు జరుగుతోంది.
గ్రూప్ సహా అన్ని ఉద్యోగ నియామకాలకు ఇంటర్వ్యూలు ఎత్తివేసిన నేపథ్యంలో పరీక్షా విధానానికి సంబంధించి తెలంగాణ పబ్లిక్ సర్వీస్ కమిషన్ రాష్ట్ర ప్రభుత్వాన్ని స్పష్టత కోరింది. కమిషన్ ప్రతిపాదనల మేరకు వాటన్నిటిని సవరిస్తూ పరీక్ష విధానానికి సంబంధించి తెలంగాణ రాష్ట్ర ప్రభుత్వం సోమవారం ఉత్తర్వులు జారీ చేసింది. ప్రభుత్వం వైపు నుంచి టిఎస్పిఎస్సి కి రావాల్సిన వివరాలు అలాగే సమాచారం దాదాపు అందాయి. ఈ నేపథ్యంలో ఈరోజులో గ్రూప్-1కి సంబందించిన నోటిఫికేషన్ కూడా విడుదల కానున్నట్లు తెలుస్తోంది.
గ్రూప్- 1 పోస్టులకు సంబంధించి ఇంటర్వ్యూలను సైతం తెలంగాణ సర్కార్ రద్దు చేసింది. దీంతో పరీక్ష విధానం మరింత పారదర్శకంగా ఉంటుందని ప్రభుత్వం చెబుతోంది. తెలంగాణలో 83,039 ఉద్యోగ ఖాళీలను భర్తీ చేస్తామని సీఎం కేసీఆర్‌ ప్రకటించిన నేపథ్యంలో ఈ గ్రూప్-1 ఖాళీల భర్తీకి అనుమతులు ఇస్తూ ఆర్థిక శాఖ జీఓ విడుదల చేసింది. కాగా, చాలా ఏళ్ల తర్వాత గ్రూప్- 1 నోటిఫికేషన్ విడుదల అవుతుండడంతో భారీగా అభ్యర్థులు దరఖాస్తు చేసుకునే అవకాశం ఉంది. వయో పరిమితిని కూడా సడలించడంతో లక్షల్లో అభ్యర్థులు పోటీ పడే అవకాశాలున్నాయి.