న్యూడ్ వీడియోలు సోషల్ మీడియాలో అప్‌లోడ్ చేస్తానని బెదిరించి.. వివాహితపై స్పెషల్ బ్రాంచ్ కానిస్టేబుల్ పలుమార్లు అత్యాచారానికి పాల్పడిన ఘటన హైద‌రాబాద్‌లోని మీర్ పేట్ పోలీస్స్టేషన్ పరిధిలో ఆలస్యంగా వెలుగులోకి వచ్చింది. సైదాబాద్కు చెందిన పి. వెంకటేశ్వర్ రావు (30) స్పెషల్ బ్రాంచ్ కానిస్టేబుల్ గా పనిచేస్తున్నాడు. అతని భార్య కొన్నేళ్ల క్రితం అనారోగ్యంతో చ‌నిపోయింది. అదే ప్రాంతానికి చెందిన ఓ వివాహిత (34)తో పరిచయం చేసుకున్నాడు. ఆమె వెంటపడి వేధించడం మొదలు పెట్టాడు. 2021లో సైదాబాద్లో ఇంట్లో ఎవరూ లేని సమయంలో ఇంట్లోకి చొరబడి అసభ్యకరంగా ప్రవర్తించడానికి యత్నించిన కానిస్టేబుల్పై ఆమె సైదాబాద్ పోలీస్స్టేషన్లో ఫిర్యాదు చేసింది.
అప్పట్లో వెంకటేశ్వర్ రావు పై ఐపీసీ 324 సెక్షన్ కింద కేసులు నమోదు చేసిన సైదాబాద్ పోలీసులు అరెస్ట్ చేసి రిమాండ్కు తరలించారు. కేసు నమోదు కావడంతో వెంటనే ఉన్నతాధికారులు అతనిపై సస్పెన్షన్ వేటు వేశారు. జైలు నుంచి బ‌య‌ట‌కు వచ్చిన త‌ర్వాత వెంకటేశ్వర్రావు తనపై పెట్టిన కేసును ఉపసంహరించుకోవాలని ఆ మ‌హిళ‌ను వేధించసాగాడు. ఆమె సైదాబాద్‌లోని జిల్లెల్గూడకు మకాం మార్చినప్పటికీ వెంటపడుతున్నాడు. అక్టోబర్ 17, 18, 19 తేదీలలో ఇంట్లో ఎవరూ లేని సమయంలో ఆమెపై బలవంతంగా అత్యాచారం చేశాడు. అత్యాచార సమయంలో తీసుకున్న కొన్ని న్యూడ్ వీడియోలు వెంటనే సోషల్ మీడియాలో పోస్ట్ చేస్తానని, తనపై పెట్టిన కేసును ఉపసంహరించుకోవాలని బెదిరించసాగాడు.
ఇక.. ఈ నెల 11వ తేదీన కూడా మరో మారు సదరు కానిస్టేబుల్ ఆమెపై అత్యాచారయత్నానికి యత్నించాడు. దీంతో బాధితురాలు మీర్పేట్ పోలీస్స్టేషన్లో ఫిర్యాదు చేసింది. ఆమె ఇచ్చిన ఫిర్యాదు మేరకు రేప్‌ కేసు నమోదు చేసుకున్న పోలీసులు అప్పటి నుంచి తప్పించుకు తిరుగుతున్న కానిస్టేబుల్ వెంకటేశ్వర్ రావు ను ఈ నెల 14వ తేదీన అరెస్ట్ చేసి, రిమాండ్కు తరలించారు. ఈ కేసును మీర్పేట్ పోలీసులు దర్యాప్తు చేస్తున్నారు.