తెలంగాణలో జరగనున్న అసెంబ్లీ ఎన్నికలో కాంగ్రెస్ పార్టీతో, బీఆర్ఎస్ పొత్తు పెట్టుకోక తప్పదని ఎంపీ కోమటిరెడ్డి వెంకట్రెడ్డి చేసిన వ్యాఖ్యలపై కాంగ్రెస్ రాష్ట్ర వ్యవహారాల ఇన్చార్జి మాణిక్రావు ఠాక్రే స్పందించారు. కాంగ్రెస్ పార్టీకి ఎవరితోనూ పొత్తుపెట్టుకునే ఉద్దేశం లేదని ఆయన స్పష్టం చేశారు. శంషాబాద్ ఎయిర్పోర్ట్ బయట మీడియాతో మాట్లాడారు. కోమటిరెడ్డి వెంకట్రెడ్డి వ్యాఖ్యలు ఆయన వ్యక్తిగతమని మాణిక్రావు ఠాక్రే అభిప్రాయపడ్డారు.
వరంగల్ బహిరంగ సభలో రాహుల్ గాంధీ చెప్పిన మాటలకే పార్టీ కట్టుబడి ఉందని ఠాక్రే అన్నారు. కోమటిరెడ్డి ఏం మాట్లాడారో తాను ఇంకా చూడలేదన్నారు. వ్యాఖ్యలు చేసిన వీడియోలు చూసి.. ఆ తర్వాత మాట్లాడతానన్నారు. అయితే కాంగ్రెస్ పార్టీతో బీఆర్ఎస్ పొత్తు పెట్టుకుంటుందని కోమటిరెడ్డి చేసిన వ్యాఖ్యలను పరిశీలిస్తున్నామని చెప్పారు.
ఠాక్రేను కలిసిన కోమటిరెడ్డి..
మరోవైపు శంషాబాద్ విమానాశ్రయంలో కాంగ్రెస్ పార్టీ రాష్ట్ర వ్యవహారాల ఇన్చార్జి మాణిక్ రావు ఠాక్రేతో ఎంపీ కోమటిరెడ్డి వెంకట్ రెడ్డి భేటీ అయ్యారు. ఢిల్లీ నుంచి శంషాబాద్ విమానాశ్రయానికి చేరుకున్న కోమటిరెడ్డి ఎయిర్ పోర్టు లాంజీలో ఆయనను కలిశారు. ఈ సందర్భంగా ఏఐసీసీ కార్యదర్శులు నదీమ్‌ జావీద్‌, బోసురాజు, హర్కర్ వేణుగోపాల్‌ తదితరులున్నారు.
తప్పుపడుతున్న కాంగ్రెస్ శ్రేణులు..
కోమటిరెడ్డి వెంకట్రెడ్డి పొత్తులపై మాట్లాడిన తీరును కాంగ్రెస్ శ్రేణులు తీవ్రంగా తప్పుపట్టాయి. రాష్ట్రంలో హంగ్ ఏర్పాటు కావడం వల్ల బీఆర్ఎస్.. కాంగ్రెస్తో పొత్తు ఉంటుందని చేసిన వ్యాఖ్యలపై దుమారమే చెలరేగుతోంది. ఇప్పటికే పీసీసీ వర్కింగ్ ప్రెసిడెంట్ మహేశ్ కుమార్ గౌడ్, సీనియర్ లీడర్, ఉపాధ్యక్షుడు మల్లు రవి, పీసీసీ ఉపాధ్యక్షుడు సామల కిరణ్ కుమార్ రెడ్డి, పీసీసీ ప్రధాన కార్యదర్శి అద్దంకి దయాకర్.. కోమటిరెడ్డి వ్యాఖ్యలకు బదులిచ్చారు.
కాంగ్రెస్ పార్టీ ఏ ఎన్నికల్లో అయినా ఒంటరిగానే పోటీ చేస్తుందని, ఎవరితో పొత్తు ఉండబోదని వరంగల్ వేదికగా రాహుల్ గాంధీ స్పష్టం చేశారని, ఇప్పుడు కోమటిరెడ్డి వెంకట్రెడ్డి చేసిన వ్యాఖ్యలు కేడర్లో, పార్టీ శ్రేణుల్లో, కార్యకర్తల్లో గందరగోళం కలిగించేలా ఉన్నాయని పీసీసీ సభ్యులు ఆందోళన వ్యక్తం చేశారు. వెంకట్రెడ్డి వ్యాఖ్యలతో.. పార్టీకి ఎటువంటి సంబంధం లేదని అది ఆయన వ్యక్తిగత అభిప్రాయమన్నారు.