కేరళలో జరిగిన పడవ ప్రమాదంలో 22 మంది దుర్మరణం చెందారు. ఇలాంటి ఘటనలు మరోసారి జరగకుండా ఉండేందుకు తగిన చర్యలు తీసుకునేలా ప్రభుత్వాన్ని ఆదేశించాలని హైకోర్టులో ప్రజా ప్రయోజన వ్యాజ్యం (పిల్) దాఖలైంది. విచారణకు స్వీకరించిన ధర్మాసనం ఇవ్వాల (శుక్రవారం) దీనిపై విచారణ చేపట్టింది. ఈ సందర్భంగా హైకోర్టు కీలక వ్యాఖ్యలు చేసింది.
– ఇంటర్నెట్ డెస్క్, ఆంధ్రప్రభ
ప్రయాణికుల రద్దీని దృష్టిలో పెట్టుకుని, ఎక్కువ మంది పడవలలో ఎక్కకుండా నివారించడానికి గరిష్ట పరిమితి నిర్ధేశించుకోవాలని, దీన్ని ప్రతి బోట్మీద ప్రత్యేకంగా కనిపించేలా ప్రదర్శించాలని కేరళ హైకోర్టు అధికారులను ఆదేశించింది. 22 మంది ప్రాణాలను బలిగొన్న తానూర్‌ పడవ దుర్ఘటన తర్వాత నమోదైన పిల్‌పై హైకోర్టు విచారణ చేపట్టింది. ప్రాథమిక నివేదికల ప్రకారం.. బోట్లో 37 మంది ఉండగా, గరిష్టంగా అనుమించవలసింది మాత్రం కేవలం 22 మాత్రమే.
ఇక.. జస్టిస్ దేవన్ రామచంద్రన్, జస్టిస్ సోఫీ థామస్‌తో కూడిన ధర్మాసనం అనుమతించదగిన గరిష్ట సంఖ్యలో ప్రయాణికులను ప్రస్ఫుటమైన ప్రదేశాలలో.. బోటింగ్ ప్రారంభ, చివరి పాయింట్ల వద్ద, క్యాబిన్ల లోపల కూడా ప్రదర్శించాలని ఆదేశించింది. ఎగువ, దిగువ డెక్‌లలో కూడా గరిష్ట సంఖ్యలో ప్రయాణికులను అనుమతించాలని కోర్టు పేర్కొంది.
అమికస్ క్యూరీ సమర్పించిన సూచనలను కూడా కోర్టు పరిశీలించింది. తదుపరి విచారణకు ముందు దానిని పరిగణనలోకి తీసుకోవాలని అధికారులను కోరింది. కేరళలోని పర్యాటకులు, ప్రయాణికుల పడవలు సరైన బీమా పరిధిలోకి వస్తాయో లేదో తనిఖీ చేయాలని కోర్టు అధికారులను కోరింది. ఈ కేసు తదుపరి విచారణను ధర్మాసనం జూన్ 7కి వాయిదా వేసింది.