– డిజిట‌ల్ మీడియా, ఆంధ్ర‌ప్ర‌భ
త‌మిళనాడులో పర్యటించిన సందర్భంగా బీజేపీ జాతీయ అధ్యక్షుడు జేపీ నడ్డా డీఎంకే ప్రభుత్వంపై కామెంట్స్ చేశారు. అందుకు డీఎంకే (ద్ర‌విడ మున్నెట్ర క‌జ‌గం) పార్టీ అంతే సీరియ‌స్‌గా రెస్పాండ్ అయ్యింది. తమిళనాడు సర్కారు అనుసరిస్తున్న విద్యావిధానం, నీట్ ను వ్యతిరేకిస్తుండడాన్ని నడ్డా త‌ప్పుబ‌ట్టారు. చదువు రాని వాళ్లు పాలిస్తే ఇట్ల‌నే ఉంటుందని సీఎం స్టాలిన్ ను ఉద్దేశించి ఛీప్ కామెంట్స్ చేశారు. అందుకు డీఎంకే అదేస్థాయిలో బదులిచ్చింది.
కేంద్రంలో అధికారం వెలగబెడుతున్న వారి విద్యార్హతలు తాము అడగబోమని, ఆ స్థాయికి తాము ఇంకా దిగజారలేద‌ని కౌంటర్ ఇచ్చింది డీఎంకే. బీజేపీలోని వారసత్వ రాజకీయాలను ప్రశ్నిస్తూ, అసలు జై షా ఎవరు? ఎన్ని సెంచరీలు కొట్టారు? క్రికెట్‌తో సంబంధం లేని వ్య‌క్తికి బీసీసీఐ సెక్రెట‌రీ ప‌ద‌వి ఎట్లా వ‌చ్చింది? అన్న ప్ర‌శ్న‌లు సంధించింది డీఎంకే పార్టీ..
అంతేకాకుండా కేంద్ర హోంమంత్రి కుమారుడు అయినందుకే జై షా భారత్ లో సుసంపన్నమైన క్రీడాబోర్డు బీసీసీఐకి కార్యదర్శిగా వ్యవహరిస్తున్నారని డీఎంకే వివరించింది. విద్వేష, విచ్ఛిన్నకర రాజకీయాలకు బీజేపీ కేరాఫ్ అడ్రస్‌గా నిలుస్తోంద‌ని అభివర్ణించింది. వచ్చే ఎన్నికల్లో తమిళనాడు ప్రజలు బీజేపీకి గ‌ట్టి బుద్ధి చెబుతారని, తమిళనాడు ప్రజలు ఎంతో వివేకవంతులని డీఎంకే పేర్కొంది.