రెండో దశలో కరోనా మహమ్మారి శరవేగంతో విస్తరిస్తున్న తరుణంలో రష్యా మరో వ్యాక్సిన్ తీసుకొచ్చినట్టు ప్రకటించింది. కరోనా నివారణకు సంబంధిం సింగిల్ డోస్ స్పుత్నిక్ వ్యాక్సిన్‌ను ఆమోదించినట్టు వెల్లడించింది. స్పుత్నిక్ ఫ్యామిలీకే చెందిన ఈ సింగిల్-డోస్ ‘స్పుత్నిక్ లైట్’ విప్లవాత్మకమైందని, 80 శాతం సామర్థ్యంతో పనిచేస్తుందని రష్యా అధికారులు తెలిపారు. రెండు మోతాదుల వ్యాక్సిన్ల కంటే స్పుత్నిక్ లైట్ టీకా చాలా ప్రభావవంతమైందని ప్రకటించారు.
రష్యా గమలేయ ఇన్స్టిట్యూట్ అభివృద్ధి చేసిన ఈ వ్యాక్సిన్ 79.4 శాతం ప్రభావవంతంగా ఉందని రష్యన్ డైరెక్ట్ ఇన్వెస్ట్‌ మెంట్ ఫండ్ (ఆర్‌డిఐఎఫ్) వెల్లడించింది. స్పుత్నిక్ లైట్ మోతాదుకు 10 డాలర్ల కంటే తక్కువ ఖర్చు అవుతుందనీ పేర్కొంది. గ‌తేడాది డిసెంబ‌ర్ 5 నుంచి ఈ ఏడాది ఏప్రిల్ 15 వ‌ర‌కూ ఈ వ్యాక్సిన్ ట్ర‌య‌ల్స్ నిర్వ‌హించారు. ఇందులో 28 రోజుల డేటాను సేక‌రించి సామ‌ర్థ్యాన్ని అంచనా వేశారు. ప్రపంచవ్యాప్తంగా టీకాల కొరత ఉన్న సమయంలో సింగిల్ డోసు వ్యాక్సిన్లు అందుబాటులోకి రావడంతో.. ఎక్కువ మందికి వేగంగా వ్యాక్సిన్ అందించే అవకాశం ఏర్పడుతుంది.