ఐకాన్ స్టార్ అల్లు అర్జున్ నటించిన పుష్ప సినిమా వసూళ్లలో తగ్గేదే లే అంటూ దూసుకుపోతోంది. తొలి రోజు భారీ కలెక్షన్లు రాబట్టిన ఈ సినిమా.. రెండో రోజూ మంచి వసూళ్లు సాధించింది. అర్జున్, సుకుమార్ ల హ్యాట్రిక్ కాంబినేష‌న్‌లో రూపొందిన ‘పుష్ప’ సినిమా డిసెంబర్ 17న విడులైంది. గత రెండు రోజులు వ‌సూళ్ల ప‌రంగా దూకుడు క‌న‌బ‌ర్చింది. శనివారం వీకెండ్ కావ‌డంతో బాక్సాఫీస్ వ‌ద్ద కలెక్షన్ వర్షం కురిసింది. ఆదివారం కావ‌డంతో ఈ సినిమా ఇదే స్థాయిలో రికార్డుల‌ను రాబ‌ట్టే అవ‌కాశం ఉంది.
మొదటి రెండు రోజుల్లో ప్రపంచవ్యాప్తంగా రూ.116 కోట్ల గ్రాస్ రాబట్టింది. ఈ మేరకు చిత్ర నిర్మాణ సంస్థ మైత్రీ మూవీ మేకర్స్ అధికారికంగా ప్రకటించింది. ఈ ఏడాదిలో ఇవే అత్యధిక వసూళ్లంటూ పేర్కొంది. హిందీలోనూ పుష్ప సినిమా దూసుకుపోతోంది. మొదటి రోజు హిందీలో రూ.3.05 కోట్లు, రెండో రోజు రూ.4.02 కోట్లు రాబట్టింది. రెండు రోజుల్లో హిందీలో మొత్తం రూ.7.07 కోట్ల నెట్ సాధించింది.