హైదరాబాద్ శివారులోని నార్సింగి రోటరీ వద్ద వాహనాల తనిఖీ చేస్తున్న పోలీసులకు వింత పరిస్థితి ఎదురయ్యింది. పోలీసులను చూసి తప్పించుకుని పారిపోతున్న వారిపై అనుమానంతో వారిని వెంబడించి పట్టుకోగా రెండు కార్లలో తరలిస్తున్న కోటి రూపాయల నగదు కనిపించింది. దీంతో పోలీసులు ఆ నగదుసు సీజ్ చేశారు. క్యాష్ తరలిస్తున్న ఐదుగురు వ్యక్తులను అదుపులోకి తీసుకుని ఎంక్వైరీ చేస్తున్నారు. ఈ నగదును మునుగోడు ఉప ఎన్నిక కోసం తరలిస్తున్నట్లు పోలీసుల ప్రాథమిక విచారణలో తేలింది.
కోమటిరెడ్డి సుమంత్ రెడ్డి, కోమటిరెడ్డి పవన్ రెడ్డి వద్దకు ఈ డబ్బు తీసుకెళ్తున్నట్లు పట్టుబడ్డ ముగ్గురు వ్యక్తులు పేర్కొన్నారు. కోకాపేట వాసి సునీల్ రెడ్డి నుంచి కోటి రూపాయలు తీసుకెళ్తున్నట్లు వారు ఒప్పుకున్నారు. మునుగోడు ఉపఎన్నిక నేపథ్యంలో ఆ నియోజకవర్గానికి వెళ్లే దారుల్లో పోలీసులు చెక్‌ పోస్టులు ఏర్పాటు చేసి ముమ్మరంగా తనిఖీలు నిర్వహిస్తున్నారు. నగదు తరలిస్తున్న వ్యక్తులను దేవరాజు, శ్రీకాంత్‌, విజయ్ కుమార్‌, నాగేశ్, దాసరి లూథర్‌గా పోలీసులు గుర్తించారు.
