చంద్రబాబు ఇంటి వద్ద అనుమానాస్పదంగా వ్యక్తి.. ఆరా తీస్తే..

హైదరాబాదులో ఉన్న ఏపీ మాజీ సీఎం, టీడీపీ అధినేత నారా చంద్రబాబు నాయుడు ఇంటి వద్ద అనుమానాస్పదంగా తిరుగుతున్న వ్యక్తిని జూబ్లీహిల్స్ పోలీసులు అదుపులోకి తీసుకున్నారు. ప్రశ్నించిన అనంతరం అతడిని విడిచిపెట్టారు. తనది కడప జిల్లా రాజంపేట మండలం చక్రంపేట అని, తన పేరు సుబ్బారెడ్డి అని ఆ వ్యక్తి పోలీసులకు తెలిపాడు. తన కుటుంబ ఆస్తి తగాదాలతో తన తండ్రి, సవతి తల్లి, వారి కుమారుల నుంచి ప్రాణహాని ఉందని చెప్పాడు. మాజీ ముఖ్యమంత్రి, టీడీపీ అధినేత చంద్రబాబుకు తన సమస్యను చెప్పుకుందామని వచ్చానన్నాడు.. న్యాయం చేయమని అడగాలనే ఇక్కడికి వచ్చాను అన్నాడు. అతడు చెప్పిన సమాధానంతో పోలీసులు ముందు ఆశ్చర్యపోయారు. చంద్రబాబును కలిసేందుకు రెండు రోజులుగా ఇక్కడ తిరుగుతున్నట్లు సుబ్బారెడ్డి చెప్పారు. ఈ అంశాన్ని చంద్రబాబు దృష్టికి తాము తీసుకెళ్తామని పోలీసులు అతడికి సర్థిచెప్పారు. అతడు చెప్పిన వివరాలు నమోదు చేసుకొని.. తిరిగి కడప జిల్లాలోని సొంత ఊరికి పంపించారు.