అక్టోబర్లో చమురు ఉత్పత్తిని తగ్గించాలని ఒపెక్ ప్లస్ నిర్ణయించిన‌ట్టు తెలుస్తోంది. ఓపెక్ ప్లస్ అనేది ప్ర‌పంచ వ్యాప్తంగా చమురు ఉత్పత్తి, సప్లయ్ చేసే కంపెనీగా ఉంది. కాగా, ఏడాది కాలంలో ఇదే తొలిసారి అంటున్నారు మార్కెట్ ప‌రిశీల‌కులు. ఇక అంతర్జాతీయంగా పతనమవుతున్న చమురు ధరల్లో స్థిరత్వాన్ని తీసుకొచ్చేందుకే అక్టోబర్లో చమురు సప్లయ్ని కూడా తగ్గించనున్నట్టు తెలుస్తోంది. ఒపెక్+ సమావేశం సోమవారం జరిగింది.
ఈ నేపథ్యంలో అక్టోబర్ నెలకు గాను.. చమురు ఉత్పత్తిని రోజుకు 1,00,000 బ్యారెళ్లకు తగ్గించాలని నిర్ణయించారు. ఇది అగస్టు లెవల్స్కు సమానం. ఇటీవలి కాలంలో చమురు ధరల్లో తీవ్ర ఒడుదొడుకులు ఎదురయ్యాయి. చమురు మార్కెట్లో లిక్విడిటీ తగ్గింది. అందువల్ల.. చమురు ధరల్లో స్థిరత్వాన్ని తీసుకొచ్చేందుకు సప్లయ్ని తగ్గిస్తున్నామని ఒపెక్ వెల్లడించిది.
వచ్చే నెల 5వ తేదీన.. మరోమారు భేటీ కానున్న‌ట్టు ఓపెక్ ప్లస్ తెలిపింది. అయితే.. అవసరమైతే ఈలోపు మళ్లీ సమావేశమవుతామని చెప్పింది. చమురు ఉత్పత్తి తగ్గితే.. సప్లయ్ పడిపోతుంది. సప్లై పడిపోతే.. డిమాండ్ విపరీతంగా పెరుగుతుంది. దీని ఫలితంగా చమురు ధరలు మళ్లీ పెరుగుతాయి. ఇలా చమురు ధరలు పెరిగితే.. ద్రవ్యోల్బణం కూడా పెరిగే ప్రమాదం ఉందని మార్కెట్ నిపుణులు అంచ‌నా వేస్తున్నారు.
మరోవైపు.. చమురును దిగుమతి చేసుకుంటున్న మూడో అతిపెద్ద దేశంగా భారత్ కొనసాగుతోంది. అంతర్జాతీయంగా చమురు ధరలు పెరిగితే.. ఆ భారం ఇండియాపైనే ఎక్కువ‌గా పడుతుంది. ఇదే కొనసాగితే.. దేశీయంగా పెట్రోల్, డీజిల్ ధరలు పెరిగినా ఆశ్చర్యపోవాల్సిన అవసరం లేదంటున్నారు ప‌రిశీల‌కులు.
పెరిగిన చమురు ధరలు..
ఒపెక్ నిర్ణయంతో అంతర్జాతీయంగా చమురు ధరలు బ్యారెల్కు 3డాలర్లు పెరిగాయి. ప్రస్తుతం.. నవంబర్కు చెందిన బ్రెంట్ క్రూడ్ ఫ్యూచర్స్.. 3.57డాలర్లు వృద్ధి చెంది.. 96.59 డాలర్ల వద్ద ఉంది. జూన్ నెలలో 120 డాలర్ల మార్కును తాకిన బ్రెంట్ క్రూడ్.. ఆ తర్వాత 95డాలర్లకు పడిపోయింది.