26/11 ముంబై ఉగ్రదాడి ప్రధాన సూత్రధారి సాజిద్ మీర్‌ను పాకిస్థాన్ ఇవ్వాల (శుక్రవారం) అరెస్టు చేసింది. అతను కొన్నాళ్ల క్రితమే చనిపోయినట్టు ఇన్ని రోజులు బొంకుతూ వచ్చిన పాకిస్థాన్ ఇవ్వాల ఎట్టకేలకు అతడిని అరెస్టు చేయడం గమనార్హం. లష్కరే తోయిబా (ఎల్‌ఈటీ)కి చెందిన అగ్రశ్రేణి లీడర్ అయిన మీర్ తలపై $5 మిలియన్ల రివార్డు ఉంది. ఇంకా అతను FBI మోస్ట్ వాంటెడ్ టెర్రరిస్టుల జాబితాలో ఉన్నాడు. ముంబై దాడుల్లో మొత్తం 166 మంది చనిపోయారు. ISI మద్దతుతో దాడులు చేసిన వారి కోసం ప్రత్యక్షంగా సన్నాహాలు, నిఘాలో మీర్ హెల్ప్ చేసినట్టు తెలుస్తోంది. ఉగ్రవాదులు ముంబైలో ఉన్నప్పుడు అతని ద్వారానే పాకిస్థాన్ నుంచి కీలక ఆదేశాలు జరీ అయినట్టు సమాచారం.
అయితే.. గతంలో తమ దేశంలో మీర్ అనే వ్యక్తి ఎవరూ లేరని పాకిస్థాన్ చెబుతూ వచ్చింది. అంతేకాకుండా అతను తమ దేశానికి చెందినవాడే కాదని దాడుల ఘటనను తమపై రుద్దేందుకు ఇలా చేస్తున్నారని కొట్టిపారేసింది. ఆ తర్వాత కొంతకాలానికి మీర్ చనిపోయాడని పేర్కొంది పాకిస్థాన్. ఇక.. గ్లోబల్ కమ్యూనిటీ నుండి ముఖ్యంగా G-7 యొక్క మనీ-లాండరింగ్ వ్యతిరేక సంస్థ ఫైనాన్షియల్ యాక్షన్ టాస్క్ ఫోర్స్ (FATF) నుండి ఒత్తిడి తీవ్రం అయినప్పుడు కూడా ఇదే విషయాన్ని పాకిస్తాన్ వెల్లడించింది.
ముంబై దాడులకు పాల్పడ్డ వారిలో కీలక నేత మీర్ పాకిస్థాన్లోనే ఉన్నాడని చాలా సాక్ష్యాలున్నప్పటికీ ఆ దాడి చేసినవారు పాకిస్థానీ వ్యక్తులు కాదని, పాకిస్థాన్ కొట్టిపారేసింది. దాడి తర్వాత సజీవంగా పట్టుబడిన అజ్మల్ కసబ్ కూడా తమ దేశస్తుడు కాదని పాక్ తొలుత తెలిపింది. కానీ, కసబ్ ఒకారా జిల్లా ఫరీద్‌కోట్‌కు చెందినవాడని ఆధారాలతో రుజువు అయ్యే దాకా ఇట్లాంటి మాటలే బొంకింది పాకిస్థాన్. ఇక.. ఫైనాన్షియల్ యాక్షన్ టాస్క్ ఫోర్స్ (FATF) యొక్క పర్యవేక్షణలో ఉన్న దేశాల “గ్రే లిస్ట్”లో పాకిస్థాన్ ని చేర్చినట్టు పారిస్‌కు చెందిన గ్లోబల్ మనీలాండరింగ్, టెర్రర్-ఫైనాన్సింగ్ వాచ్‌డాగ్ స్పష్టం చేసింది.