టీఆర్ఎస్ ఎమ్మెల్యే పైలట్ రోహిత్ రెడ్డిని చంపేస్తామని బెదిరింపు ఫోన్ కాల్స్ వస్తున్నాయి. ఈ మేరకు ఆయన ఆదివారం మాదాపూర్ ఏసీపీ సీహెచ్ రఘునందన్ రావుకు కంప్లెయింట్ చేశారు. ఫోన్ కాల్స్ చేసి తనను చంపేస్తామని బెదిరింపులకు పాల్పడుతున్నారని ఆ ఫిర్యాదులో పేర్కొన్నారు. ఈ ఫోన్ కాల్స్ ఎక్కువగా ఉత్తరప్రదేశ్, గుజరాత్ రాష్ట్రాల నుంచి వస్తున్నట్టు తెలిపారు. 11 ఫోన్ నెంబర్ల నుంచి తనకు విపరీతమైన ఫోన్ కాల్స్ వస్తున్నాయని పోలీసులకు తెలియజేశారు.
కాల్ చేసిన వ్యక్తులు తనను అసభ్య పదజాలంతో తిడుతున్నారని, తాను త్వరలో చనిపోవడం ఖాయమని చెబుతున్నారని, వారి వాల్ల తనకు ప్రాణహాని ఉందన్నారు. ఫోన్ చేసిన వారిపై చర్యలు తీసుకోవాలని ఎమ్మెల్యే రోహిత్రెడ్డి పోలీసులను కోరారు. కాగా, ఈ ఫిర్యాదును పరిశీలించిన పోలీసులు కేసు నమోదు చేసి దర్యాప్తు చేస్తున్నారు.
ఇక.. బీజేపీతో తమను కొనుగోలు చేయడానికి యత్నించిందని ఎమ్మెల్యే రోహిత్రెడ్డి ముగ్గురిపై మొయినాబాద్ పోలీస్ స్టేషన్‌లో గతంలో ఫిర్యాదు చేశారు. టీఆర్‌ఎస్‌కు చెందిన నలుగురు ఎమ్మెల్యేలను బీజేపీలోకి లాక్కునేందుకు ప్రయత్నించారని ఆ ఫిర్యాదులో తెలిపారు. బీజేపీ ఏజెంట్లు కొంతమంది తాము బీజేపీలో చేరితే పెద్దమొత్తంలో డబ్బు, పార్టీలో ప్రముఖ పదవులు, కేంద్ర ప్రభుత్వ కాంట్రాక్టులు ఇప్పించేందుకు తమతో డీల్ చేసుకోవడానికి వచ్చారని తెలిపారు. దానికి సంబంధించిన ఆడియో రికార్డింగ్‌లు కూడా ఆ మధ్య సోషల్ మీడియాలో చక్కర్లు కొట్టాయి. బీజేపీ మాట వినకుంటే సీబీఐ, ఈడీ దాడులు చేయిస్తామని, అక్రమ కేసులు పెట్టి తమను అరెస్టు చేయిస్తామని బెదిరించారని రోహిత్ రెడ్డి ఆరోపించారు.
కాగా, బీజేపీకి చెందిన ముగ్గురు వ్యక్తులు – రామచంద్ర భారతి, నంద కుమార్, సింహయాజి స్వామిని మొయినాబాద్ పోలీసులు అరెస్టు చేశారు. ఈ కేసును విచారించేందుకు తెలంగాణ ప్రభుత్వం ప్రత్యేక దర్యాప్తు బృందాన్ని ఏర్పాటు చేసింది. ఈ సిట్ బృందానికి హైదరాబాద్‌ పోలీస్ కమిషనర్‌ సీవీ ఆనంద్‌ నేతృత్వం వహిస్తున్నారు.