భారతదేశం, ఇరాన్ మధ్య ఉమ్మడి వారసత్వం అయిన ఉర్దూ, పర్షియన్ భాషలతో పాటు చారిత్రక మాన్యుస్క్రిప్ట్ల మరమ్మతు, పరిరక్షణ, డిజిటలైజేషన్ వంటి అంశాలపై ఇవ్వాల (బుధవారం) ఒక అవగాహన ఒప్పందం కుదిరింది. కాగా, మంత్రి కేటీఆర్ సమక్షంలో హెచ్ఈ ఇస్లామిక్ రిపబ్లిక్ ఆఫ్ ఇరాన్ రాయబారి డాక్టర్ అలీ చెగేని ఈ ఎంఓయూని అందుకున్నారు. స్టేట్ ఆర్కైవ్స్ & రీసెర్చ్ ఇన్‌స్టిట్యూట్, తెలంగాణ ప్రభుత్వం.. నూర్ మైక్రోఫిల్మ్ ఇంటర్నేషనల్ సెంటర్, ఇరాన్ కల్చరల్ హౌస్, ఇండియాలోని ఇరాన్ ఎంబసీ, ఢిల్లీ మధ్య దీనికి సంబంధించిన ఒప్పందం ఉండనుంది.
ఈ చొరవ లక్షలాది పత్రాలకు జీవం పోస్తుందని, భవిష్యత్ తరాలకు తెలంగాణకు సంబంధించిన గొప్ప వారసత్వం, చారిత్రక అంశాలను తెలియజేసేలా ఉంటుందని మంత్రి కేటీఆర్ అన్నారు. ఎంఓయూ కార్యక్రమంలో ITE&C ప్రిన్సిపల్ సెక్రటరీ జయేష్ రంజన్, స్టేట్ ఆర్కైవ్స్ & రీసెర్చ్ ఇనిస్టిట్యూట్ డైరెక్టర్ డాక్టర్ జరీనా పర్వీన్, నూర్ ఇంటర్నేషనల్ మైక్రోఫిల్మ్ సెంటర్ డైరెక్టర్ డాక్టర్ మెహదీ ఖాజే పిరి, ప్రత్యేక కార్యదర్శి డాక్టర్ ఇ.విష్ణు వర్ధన్ రెడ్డి పాల్గొన్నారు.
