హైదరాబాద్‌,ఆంధ్రప్రభ: హైదరాబాద్‌ నుంచి షిరిడీ వయా శనిసింగాపూర్‌, ఎల్లోరా టూర్‌ని తెలంగాణ పర్యాటకాభివృద్ధి సంస్థ (టీఎస్‌టీడీసీ) ప్రారంభిం చింది. ఈ సందర్భంగా.. హైదరాబాద్‌ నుంచి షిరిడీకి వెళ్లే భక్తుల కోసం ప్రత్యేక టూర్‌ ప్యాకేజిని ప్రారంభించినట్లు టీఎస్‌టీడీసీ ఎండీ మనోహర్‌రావు తెలిపారు. ప్రతి బుధ, శుక్రవారాల్లో ఈ ప్రయాణం మొదలవుతుంది. ఆయా రోజుల్లో సాయంత్రం 4 గంటలకు బేగంపేటలోని టూరిజం ప్లాజా నుంచి ప్రత్యేక బస్సు సందర్శకులతో బయలుదేరుతుంది. మూడ్రోజులపాటు సాగే ఈ టూర్‌కు పెద్దలకు రూ.3,250 మరియు పిల్లలకు రూ.2,060 చెల్లించవలసి ఉంటుంది. వెళ్లే ప్రయాణంలో శనిసింగనాపూర్‌ని సందర్శించి, తిరుగు ప్రయాణంలో అజంతా ఎల్లోరాను సందర్శించేలా టూర్‌ను రూపొందించారు.
షిరిడీలో ఒక రాత్రి బస ఏర్పాటు చేస్తారు. మెత్తం మూడు రోజులుగా సాగే ఈ టూర్‌ని తెలంగాణ టూరిజం వెబ్‌సైట్‌లోబుక్‌ చేసుకోవచ్చు. సందేహాల కోసం 1800-425- 46464 టొల్‌ఫ్రీ నెంబర్‌కు కాల్‌ చేసి సంప్రదించవచ్చు. షిరిడీ సాయిబాబా ఆలయ అధికారులు కొవిడ్‌ నిబంధనలను అనుసరించి వ్యాక్సినేషన్‌ సర్టిఫికెట్‌, ఫొటో గుర్తింపు కార్డు అడుగుతున్నందున దర్శనం టికెట్లను ఎవరికి వారే ఆన్‌లైన్‌లో బుక్‌ చేసుకోవాలని టీఎస్‌టీడీసీ ఎండీ సూచించారు.