గుజరాత్ రాష్ట్రంలోని మచ్చు నదిపై ఉన్న మోర్బీ కేబుల్ బ్రిడ్జి కుప్పకూలిన ఘటనపై హైకోర్టు సీరియస్ అయ్యింది. అక్టోబర్ 30వ తేదీన జరిగిన ఈ దుర్ఘటనలో 135 మంది ప్రాణాలు కోల్పోయారు. వందలాది మంది తీవ్రంగా గాయపడ్డారు. అయితే.. ఇవ్వాల (సోమవారం) హైకోర్టు దీన్ని సుమోటాగా విచారణకు స్వీకరిస్తూ రాష్ట్ర ప్రభుత్వానికి, స్థానిక అధికారులకు నోటీజులు జారీ చేసింది. నవంబర్ 14వ తేదీ లోపు దీనిపై స్టేటస్ రిపోర్ట్ అందజేయాలని కోరింది.
తాము మోర్బీ ఘటనను సుమోటాగా విచారణకు తీసుకుంటున్నామని గుజరాత్ హైకోర్టు చీఫ్ జస్టిస్ అరవింద్ కుమార్, జస్టిస్ అశుతోష్ శాస్త్రితో కూడిన డివిజన్ బెంచ్ అడ్వకేట్ జనరల్‌ను ఉద్దేశించి చెప్పింది. వార్తాపత్రికల కథనం ఆధారంగా బెంచ్ ఈ సంఘటనను పరిగణనలోకి తీసుకుంది. రాష్ట్ర ప్రభుత్వ ప్రధాన కార్యదర్శి, రాష్ట్ర హోం శాఖ, మునిసిపాలిటీల కమిషనర్, మోర్బీ మున్సిపాలిటీ, జిల్లా కలెక్టర్, రాష్ట్ర మానవ హక్కుల కమిషన్ ద్వారా రాష్ట్ర ప్రభుత్వానికి నోటీసులు జారీ చేసింది.
నవంబర్ 14న ఈ అంశాన్ని విచారణ జరపనున్నట్టు ద్విసభ్య ధర్మాసనం తెలిపింది. అదేవిధంగా ప్రభుత్వం దీనిపై తగు చర్యలు తీసుకునేలా చూడాలని, వచ్చే సోమవారం నాటికి స్టేటస్ రిపోర్టును దాఖలు చేయాలని ప్రభుత్వ ప్రధాన కార్యదర్శి, హోంశాఖ కార్యదర్శిని హైకోర్టు ఆదేశించింది. ఈ వ్యవహారంపై నవంబర్ 14లోగా నివేదిక ఇవ్వాలని రాష్ట్ర మానవ హక్కుల కమిషన్‌ను కూడా కోర్టు ఆదేశించింది. ఒక ప్రైవేట్ సంస్థ ద్వారా ఏడు నెలల మరమ్మతుల తర్వాత మోర్బీ వంతెనను అక్టోబర్ 26న ప్రజల సందర్శన కోసం రీ ఓపెన్ చేశారు.
