దేశంలో మీడియా రంగం రోజు రోజుకు దెబ్బతింటోంది. కొవిడ్–19 ప్రభావంతో చాలామటుకు మీడియా సంస్థలు తమ ప్రింటింగ్ ఎడిషన్లను క్లోజ్ చేశాయి. ఆన్లైన్, వెబ్పేపర్లను రన్ చేస్తూ.. ఇప్పటిదాకా ఉన్న పేరు, ప్రతిష్టలను కాపాడుకునే పనిలో పడ్డాయి. దీంతోపాటు రష్యా–ఉక్రెయిన్ వార్ కూడా మీడియా రంగాన్ని కుదిపేస్తోంది. న్యూస్ ప్రింట్ ప్రొడ్యూస్ అయ్యేది ఎక్కువగా ఈ దేశాల నుంచే. దీనివల్ల ఇంపోర్ట్ ఆగిపోవడంతో న్యూస్ప్రింట్ కాస్ట్ కూడా విపరీతంగా పెరిగిపోయింది. ప్రింట్ మీడియాపై బాగా ఎఫెక్ట్ పడింది. దీంతో ఏం చేయాలో తెలియని డైలమాలో మీడియా రంగం ఉండిపోయింది. అయితే.. కేంద్రం తీసుకురాబోతున్న కొత్త చట్టాలతో మీడియా హౌజ్లకు మేలు జరుగుతుందన్న వాదన వినిపిస్తోంది. గూగుల్, ఫేస్బుక్, యూట్యూబ్ ఇన్స్టా వంటి గ్లోబల్ టెక్ సంస్థల నుంచి ఆదాయాన్ని షేర్ చేసుకునే వెసలుబాటు కల్పించేలా చట్టం తేబోతున్నట్టు లీక్ అయిన సమాచారాన్ని బట్టి తెలుస్తోంది.. ఇదే నిజమైతే ఇక దేశీయ మీడియా రంగం ఆదాయ బాటపడుతుందనడంలో సందేహం లేదు..
– నాగరాజు చంద్రగిరి, ఆంధ్రప్రభ
ఆస్ట్రేలియా, కెనడా, ఫ్రాన్స్ దేశాల్లో మాదిరిగానే.. ఇప్పుడు గూగుల్, ఫేస్బుక్ వంటి టెక్ దిగ్గజాలు తమ ప్లాట్‌ఫారమ్‌లలో వచ్చే వార్తల కంటెంట్‌కు నగదు చెల్లించేలా భారతదేశం కొత్త చట్టం తీసుకురాబోతోందా? ఇప్పుడు అట్లాంటి చట్టం తయారై, తుది మెరుగులు దిద్దుకుంటోందా? అంటే అవుననే సమాధానమే అనధికారికంగా వినిపిస్తోంది. ప్రతిపాదిత చట్టం అమల్లోకి వస్తే కనుక.. ఆల్ఫాబెట్ (గూగుల్, యూట్యూబ్ యజమాని), మెటా (ఫేస్బుక్, ఇన్‌స్టాగ్రామ్, వాట్సాప్ యజమాని), ట్విట్టర్ , అమెజాన్ వంటి గ్లోబల్ టెక్ సంస్థలు.. భారతీయ వార్తాపత్రికలు, డిజిటల్ న్యూస్ పబ్లిషర్‌లకు తమ ఆదాయంలో వాటా చెల్లించాల్సి ఉంటుంది. ఈ వార్తా కేంద్రాల ద్వారా వచ్చే అసలైన కంటెంట్‌ని ఉపయోగించడం ద్వారా మీడియా సంస్థలకు మెరుగైన ఆదాయం దక్కే చాన్స్ ఉంటుంది.
ఇక..ఈ టెక్ దిగ్గజాలు మీడియా సంస్థల నుండి వచ్చే వార్తల కంటెంట్‌ను తమ ప్లాట్ఫామ్లలో ఉంచడం ద్వారా ఆదాయాన్ని ఆర్జిస్తున్నప్పటికీ.. మీడియా సంస్థలకు సరైన రీతిలో ఆదాయాన్ని పంచడం లేదనే ఆరోపణలున్నాయి. ఈ క్రమంలోనే కొత్త చట్టం ఆవశ్యకత ఏర్పడిందనే వాదన వినిపిస్తోంది. వార్తా ప్రచురణలతో ఈ డిజిటల్ వార్తల మధ్యవర్తులైన టెకీ సంస్థలు అపారమైన ఆదాయ వనరులను పొందుతున్నట్టు తెలుస్తోంది. అంతేకాకుండా మీడియా సంస్థలపై పక్షపాతం చూపుతున్నారనే ఆందోళన కూడా వ్యక్తం అవుతోంది..
ఇంటర్నెట్‌లో ఆధిపత్య స్థానాన్ని బిగ్ టెక్ దుర్వినియోగం చేయడంపై ప్రపంచవ్యాప్త పోరాటం జరిగింది. అనేక దేశాలలోని వార్తా సంస్థలు బిగ్టెక్ దోపిడీ, గుత్తాధిపత్యంతో ఇబ్బందులు ఎదుర్కొంటున్నాయి. ఇప్పుడు చట్టం ప్రకాం.. లేదా జరిమానాల ద్వారా అట్లాంటి ముప్పును పరిష్కరించడానికి కొన్ని దేశాలు మార్గాలను వెతకడం ప్రారంభించాయి. ఫ్రాన్స్, ఆస్ట్రేలియా వంటి దేశాలు బిగ్ టెక్‌తో టెక్నో-వాణిజ్య ఒప్పందాలపై చర్చలు జరుపినప్పుడు తమ దేశీయ వార్తా పబ్లిషర్‌లకు మంచి స్థాయిని అందించడానికి నిర్దిష్ట చట్టాలను ప్రవేశపెట్టాయి. కాగా, కెనడా కూడా ఈ మధ్యనే ఒక బిల్లును ప్రవేశపెట్టింది. ఇది Google ఆధిపత్యాన్ని అంతం చేయడంతోపాటు.. న్యాయమైన రాబడిగల ఆదాయాలను నిర్ధారించడానికి ప్రతిపాదించినట్టు అవగతమవుతోంది. ఇట్లాంటి ఎత్తుగడలతో కేవలం మీడియా సంస్థల ప్రయోజనాలకే కాకుండా.. వినియోగదారులకు కూడా మేలు జరుగుతుంది. డిజిటల్ ప్లాట్‌ఫారమ్‌లు, న్యూస్ ప్రొవైడర్‌ల మధ్య రాబడి భాగస్వామ్యం వినియోగదారులకు ఎలా ప్రయోజనం చేకూరుస్తుంది అనే అంశాలను పరిశీలిస్తే..
మంచి న్యూస్ ప్రొడ్యూస్ చేయడం..
క్రియేట్ చేసే న్యూస్ కంటెంట్‌కు తగిన రెమ్యునరేషన్ పొందడం ద్వారా పలు మీడియా హౌస్‌లకు స్థిరమైన, మంచి ఆదాయం అందుంతుంది. ఈ ఆదాయాన్ని వారి డిజిటల్ న్యూస్ పోర్టల్‌లను సరిదిద్దడానికి, ట్రాఫిక్, పేజీ వ్యూస్, SEO ర్యాంకింగ్‌ల క్యాట్ అండ్ మౌస్ రేస్‌ను అధిగమించడానికి.. పాఠకుల కోసం బెటర్ న్యూస్, డిఫరెంట్ కంటెంట్ డెవలప్ చేయడంపై దృష్టి పెట్టడానికి చాన్స్ ఉంటుంది..
జర్నలిస్టులకు మెరుగైన ఆదాయం..
మీడియా హౌస్ల వద్ద ఎక్కువ ఫండ్స్ ఉండటం వలన వార్తా సంస్థలు ఎక్కువ మంది జర్నలిస్టులను నియమించుకోవడానికి చాన్స్ ఉంటుంది. ప్రస్తుతం ఉన్న ఉద్యోగులకు మెరుగైన వేతనాలు ఇవ్వడానికీ వీలు కలుగుతుంది. ఇది మెరుగైన, నాణ్యమైన జర్నలిజాన్ని ప్రోత్సహిస్తుంది. కంటెంట్ కోసం వినియోగదారులను నేరుగా చెల్లింపులు చేయడం అనేది ప్రచురణకర్తలకు సహాయపడుతుంది. క్రమంగా, ఇది డిజిటల్ అడ్వర్టైజింగ్ స్ట్రీమ్‌లపై ఆధారపడటాన్ని తగ్గిస్తుంది.
నకిలీ వార్తలను తనిఖీ చేయడం..
గూగుల్, ఫేస్బుక్ వంటి ప్లాట్‌ఫారమ్‌లు తమ అల్గారిథమ్‌ల కారణంగా నకిలీ వార్తల నుండి లాభం పొందుతాయనే ఆరోపణలున్నాయి. ఉదాహరణకు గూగుల్ తన మొత్తం యాడ్ ట్రాఫిక్‌లో 48శాతాన్ని నకిలీ లేదా తప్పుదారి పట్టించే వార్తల సైట్‌లకు అందజేస్తుందన్న విమర్శలున్నాయి. ఫేస్బుక్ కూడా 2016 US ఎన్నికలు, కోవిడ్-19 మహమ్మారి సమయంలో చూసినట్లుగా.. వాస్తవ వార్తలను కాకుండా తప్పుడు సమాచారాన్ని ప్రచారం చేయడం వంటి ఆరోపణలున్నాయి.
కట్టింగ్ కార్నర్‌లు ఉండవు..
తగినంత ఆదాయాలు లేకపోవడంతో మీడియా రంగం వ్యాపార ఖర్చును తగ్గించుకునే మార్గాలను అన్వేషిస్తుంది. అయితే వారు క్రియేట్ చేసే వార్తల కోసం డిజిటల్ ప్లాట్‌ఫారమ్‌ల నుండి నిధులు పెరగడం వల్ల మీడియా హౌజ్‌లు ఈ వనరులను వదులుకోవడానికి ఇష్టపడరు. దీంతో వార్తలను వ్యాప్తి చేయడానికి వినియోగదారులకు -స్నేహపూర్వక మార్గాలను అభివృద్ధి చేయడానికి వీలు కలుగుతుంది.
