సాగునీటి ప్రాజెక్టులో భూములు కోల్పోయిన గౌరవెల్లి గ్రామాస్తులు త‌మ‌కు త‌గిన న్యాయం చేయాల‌ని ఆందోళ‌న చేస్తున్నారు. ఇది కాస్త ఉద్రిక్తంగా మారింది. దీంతో ప్ర‌భుత్వం జోక్యం చేసుకుని ఆ సమస్య ప‌రిష్కారానికి ట్ర‌బుల్ షూట‌ర్ మంత్రి హ‌రీశ్‌ని పంపింది. కాగా, సిద్ధిపేట జిల్లా చిన్నకోడూరు మండలం మెట్టుబండల వద్ద మంత్రి హరీశ్ రావుని గౌరవెల్లి భూ నిర్వసితులు ఇవ్వాల క‌లిశారు. ఈ సంద‌ర్భంగా వారితో పాటు మాజీ ఎంపీ పొన్నం ప్రభాకర్, నాయకులు కోదండ రెడ్డి కూడా ఉన్నారు.
అయితే.. నిర్వాసితులను మంత్రి హరీశ్ రావు సాదరంగా ఆహ్వానించారు.. వీరి మ‌ధ్య దాదాపు గంటసేపు చర్చలు కొన‌సాగిన‌ట్టు తెలుస్తోంది. కాగా, నిర్వాసితుల డిమాండ్లపై మంత్రి సానుకూలంగా స్పందించిన‌ట్టు స‌మాచారం. మంత్రి హరీశ్, నిర్వాసితుల మ‌ధ్య జ‌రిగిన చర్చలు స‌ఫ‌ల‌మైన‌ట్టు తెలుస్తోంది. ఈ చ‌ర్చ‌ల అనంత‌రం నిర్వాసితులకు, కాంగ్రెస్ నాయకులకు మంత్రి హరీష్ రావు భోజ‌నం పెట్టించి మ‌రీ పంపించిన‌ట్టు స‌మాచారం.
