ఉచితాలు వద్దు, అది నష్టదాయకం అని రాష్ట్రాలకు హితవుచెబుతున్న కేంద్ర ప్రభుత్వం.. తాను మాత్రం ఉచిత పథకాలను అమలుచేస్తూ గొప్పలుపోతోంది. ఈ పేరుతోని అన్నిటిపైనా టాక్స్లు, జీఎస్టీ అంటూ డబుల్ చార్జీలు వసూలు చేస్తూ గల్లాపెట్టె నింపుకుంటోంది. ఇట్లా ఉచితాలు ఇచ్చినట్టే ఇచ్చి.. జనాల నుంచి పెద్ద మొత్తంలో దండుకుంటూ పేదల కష్టార్జితం కాజేస్తోంది. ఇక.. పండుగల వేళ దేశంలోని 80కోట్ల మంది పేదలకు ఉచితంగా గోధుమలు, బియ్యం అందించే ఉచిత రేషన్ పథకాన్ని ఇవ్వాల (బుధవారం) ఎక్స్టెండ్ చేసింది.
మరో మూడు నెలల పాటు ఉచిత బియ్యం పథకం.. పీఎం గరీబ్ కళ్యాణ్ అన్న యోజన (పిఎంజికెఎవై) పథకాన్ని పొడిగిస్తున్నట్టు ఇవ్వాల మంత్రి వర్గం నిర్ణయించిందని కేంద్ర మంత్రి అనురాగ్ ఠాకూర్ ప్రకటించారు. అంతేకాకుండా దేశంలోని మూడు రైల్వే స్టేషన్లను పునరుద్ధరించే ప్రతిపాదనకు ప్రభుత్వం ఆమోదం తెలిపిందన్నారు.
44,700 కోట్లకు పైగా ఖర్చుతో ఉచిత రేషన్ పథకాన్ని పొడిగించనున్నారు. ఈ నెల వచ్చే శుక్రవారంతో ముగియనున్న 80కోట్ల మంది పేదలకు ప్రతి నెలా 5 కిలోల గోధుమలు, బియ్యం ఉచితంగా అందించే పథకం ఇప్పుడు డిసెంబర్ 31వ తేదీ వరకు అమలు కానుంది.
ఇక.. ప్రభుత్వ ఉద్యోగులకు కరువు భత్యాన్ని కూడా కేంద్రం 4 శాతం పెంచింది. 7వ వేతన సంఘం సిఫారసుల మేరకు ఈ పెంపుదల జరిగింది. తాజా పెంపుతో కేంద్ర ప్రభుత్వ ఉద్యోగులకు 38 శాతం డియర్‌నెస్ అలవెన్స్ లభిస్తుంది. ద్రవ్యోల్బణం వంటి పరిస్థితులకు అనుగుణంగా కేంద్ర ప్రభుత్వం తన ఉద్యోగులకు డియర్‌నెస్ అలవెన్స్ ని అందజేస్తుంది.
రైల్వేల పునరుద్ధరణ..
ఇదిలా ఉండగా, భారతీయ రైల్వేలకు పెద్ద ఊతమివ్వడంలో న్యూ ఢిల్లీ, అహ్మదాబాద్, CSMT ముంబై అనే మూడు ప్రధాన రైల్వే స్టేషన్లను తిరిగి అభివృద్ధి చేసే ప్రతిపాదనకు కేంద్ర మంత్రివర్గం ఆమోదం తెలిపింది. ఈ ప్రాజెక్టులో దాదాపు రూ. 10,000 కోట్ల పెట్టుబడి ఉంటుంది.