– ఇంటర్నెట్ డెస్క్, ఆంధ్రప్రభ
ఇవ్వాల (శుక్రవారం) సాయంత్రం 4 గంటలకు ఖాట్మండ్ ఇంటర్నేషనల్ ఎయిర్పోర్ట్ నుంచి న్యూ ఢిల్లీకి 173 మంది ప్రయాణికులతో బయలుదేరిన ఎయిరిండియా విమానం టేకాఫ్‌కు ముందు ఆగిపోయింది. అనుకోకుండా టైర్ పగిలిపోవడంతో విమానాన్ని ఆపవలసి వచ్చిందని ఎయిర్పోర్ట్ అథారిటీ అధికారి తెలిపారు. ఈ విమానం ఇవ్వాల సాయంత్రం 4:30 గంటలకు ఖాట్మండులోని త్రిభువన్ అంతర్జాతీయ విమానాశ్రయం (TIA) నుండి న్యూఢిల్లీకి బయలుదేరాల్సి ఉంది.
ఇక.. ఎయిర్ ఇండియాలోని డ్యూటీ ఆఫీసర్ AI 216 విమానం టేకాఫ్ అయ్యే ముందు టైర్ పగిలిపోయినట్టు ధ్రువీకరించారు. విమానంలో 164 మంది ప్రయాణికులు, 9 మంది సిబ్బంది ఉన్నారని అధికారి తెలిపారు. ఎయిర్‌బస్ 320 ఎయిర్‌క్రాఫ్ట్ ను రన్‌వే నుండి పార్కింగ్ ప్రాంతానికి తరలించినట్టు ఆయన చెప్పారు.
అవసరమైన నిర్వహణ పనులు పూర్తయిన తర్వాత ఎయిర్ ఇండియా విమానం రేపు (శనివారం) రీషెడ్యూల్ చేస్తామని ఎయిర్పోర్ట్ అథారిటీ అధికారి తెలిపారు. ఓ పత్రికా కథనం ప్రకారం మాత్రం.. విమానం టాక్సీవే నుండి థ్రెషోల్డ్ ప్రాంతానికి చేరుకుందని, టైర్ పగిలిపోయినా టేకాఫ్ కావడానికి రెడీగా ఉందని రాసుకొచ్చింది.