ఇంట్లో నిద్రిస్తున్న ఐదుగురిని అత్యంత కిరాతకంగా గొడ్డలితో నరికి హత్య చేసి.. అనంతరం తనూ గన్తో కాల్చుకుని ఆత్మహత్య చేసుకున్న విషాద ఘటన ఉత్తర్ప్రదేశ్లో చోటుచేసుకుంది. ఉత్తర్ప్రదేశ్లో నిద్రిస్తున్న ఐదుగురిని గొడ్డలితో అతికిరాతకంగా నరికి చంపాడు ఓ యువకుడు. ఈ ఘటనలో ఐదుగురు మరణించగా.. మరో ఇద్దరు తీవ్రంగా గాయపడ్డారు. ఐదుగురిని చంపిన అనంతరం.. నిందితుడు తనను తాను కాల్చుకుని ఆత్మహత్య చేసుకున్నాడు. ఈ ఘటన మైన్పురి జిల్లాలోని గోకుల్పుర్లో ఈరోజు తెల్లవారుజామున జరిగింది. సమాచారం అందుకున్న పోలీసులు.. ఘటనాస్థలికి చేరుకుని దర్యాప్తు చేపట్టారు.
అసలేం జరిగిందంటే.. గోకుల్పుర్కు చెందిన శివవీర్ యాదవ్(30).. తన సోదరులు భుల్లన్ యాదవ్(25), సోనూ యాదవ్(21), సోనూ భార్య సోనీ(20), బావ సౌరభ్(23), స్నేహితుడు దీపక్ (20)లను గొడ్డలితో నరికి చంపేశాడు. దీంతో వారంతా అక్కడికక్కడే మృతిచెందారు. అనంతరం భార్య డాలీ, మేనత్తపై దాడికి పాల్పడ్డాడు. తర్వాత తనను తాను గన్తో కాల్పులకు పాల్పడి ఆత్మహత్య చేసుకున్నాడు. తీవ్ర గాయాలపాలైన నిందితుడు శివవీర్ యాదవ్ మేనత్త, భార్యను పోలీసులు ఆస్పత్రికి తరలించారు. మృతదేహాలను శవపరీక్షల కోసం ఆస్పత్రికి తరలించారు. నిందితుడు శివవీర్ ఎందుకు ఈ హత్యలకు పాల్పడ్డాడనే కోణంలో పోలీసులు దర్యాప్తు చేపట్టారు.