సికింద్రాబాద్‌లోని ఓ ఎలక్ట్రికల్ బైక్ షోరూంలో బ్యాట‌రీలు పేలడంతో మంటలు ఎగసి పడుతున్నాయి. ఈ షోరూంలో అగ్ని ప్రమాదం జరగడంతో స్థానికులు భయాందోళనకు లోనయ్యారు. షోరూం పైన ఉన్న లాడ్జి వైపు మంటలు వ్యాపిస్తున్నాయి. ఈ మంట‌ల‌కు ఎలక్ట్రిక్ బైకులకు చెందిన బ్యాట‌రీలు పెద్ద పెద్ద శ‌బ్దాల‌తో పేలుతున్నాయి.
ఈ షోరూం పైఅంతస్తులో ఉన్న లాడ్జిలో కొంతమంది వినియోగదారులు చిక్కుకుపోయారు. కాగా, వారిని కాపాడేందుకు పోలీసులు యత్నిస్తున్నారు. ఘటనా స్థలానికి చేరుకున్న అగ్నిమాపక సిబ్బంది మంటలు ఆర్పేందుకు ప్ర‌య‌త్నిస్తున్నారు. లాడ్జిలో దట్టంగా పొగలు అలుముకోవడంతో లోపలి వారు చాలా ఇబ్బంది పడుతున్నట్లు సమాచారం.