న్యూఢిల్లీ – కాంగ్రెస్ అగ్రనేత రాహుల్ గాంధీపై అనర్హత వేటు పడింది. వయనాడ్ లోక్సభ నియోజకవర్గం నుంచి ప్రాతినిధ్యం వహిస్తున్న ఆయన్ను పదవికి అనర్హుడిగా ప్రకటిస్తున్నట్లు లోక్సభ సచివాలయం శుక్రవారం ప్రకటించింది. ప్రధాని నరేంద్ర మోడీపై అనుచిత వ్యాఖ్యలు చేసి, పరువు నష్టం కేసులో రెండేళ్లు జైలుశిక్ష పడిన నేపథ్యంలో ఈ నిర్ణయం తీసుకున్నట్లు స్పష్టం చేసింది. మార్చి 23నే రాహుల్ గాంధీ ఎంపీ పదవికి అనర్హుడైనట్లు ఓ ప్రకటనలో పేర్కొంది.
కాగా, ప్రజాప్రాతినిధ్య చట్టం ప్రకారం.. ప్రజాప్రతినిధులు ఎవరికైనా రెండేళ్లకుపైగా శిక్ష పడితే వెంటనే పదవికి అనర్హులవుతారు. అలా అనర్హతకు గురైన వ్యక్తి రానున్న 8 సంవత్సరాల వరకు ఏ ఎన్నికల్లోనూ పోటీ చేసే వీలు లేదు. ప్రజాప్రాతినిధ్య చట్టం ప్రకారం జైలు శిక్షకాలంతో పాటు మరో 6 సంవత్సరాల పాటు ఎన్నికల బరిలో దిగేందుకు అనర్హులు. మోడీ పరువు నష్టం కేసులో రాహుల్కు గుజరాత్లోని సూరత్ న్యాయస్థానం రెండేళ్లు కారాగార శిక్ష విధించింది. ఆ శిక్ష కాలం పూర్తయ్యాక.. మరో 6 సంవత్సరాలకు ఎన్నికలకు రాహుల్ దూరంగా ఉండాల్సి ఉంటుంది. ఇది ఇలా ఉంటే పరువు నష్టం కేసులో రాహుల్ గాంధీకే శిక్ష గురువారమే ఖరారైంది. ఎగువ న్యాయస్థానంలో అపీల్ చేసుకునేందుకు వీలుగా సూరత్ కోర్టు 30 రోజులు బెయిల్ ఇచ్చింది. అప్పటివరకు శిక్ష అమలును నిలుపుదల చేసింది. అయితే అనూహ్యంగా 24 గంటలలోపే రాహుల్పై అనర్హత వేటు పడింది.