“మోదీ ప్రభుత్వ వ్యూహం రాకెట్ సైన్స్ కాదు. ప్రపంచవ్యాప్తంగా దేవాస్‌పై దాడి చేయడానికి ఎన్‌సిఎల్‌టి లిక్విడేషన్ ఆర్డర్‌ను సమర్థించడానికి వారు సుప్రీంకోర్టు నిర్ణయాన్ని ఉపయోగిస్తున్నారు. అయితే.. మేము కూడా సిద్ధంగా ఉన్నాం. ప్రపంచవ్యాప్తంగా ఉన్న కోర్టులు ఈ బూటకపు విచారణలను చూస్తాయి” అని దేవాస్ ప్రతినిధి ఒకరు అన్నారు.
మల్టీ మీడియా సంస్థ దేవాస్ విదేశాల్లోని భారత ప్రభుత్వ ఆస్తులను స్వాధీనం చేసుకోవడానికి ప్రయత్నాలు ముమ్మరం చేస్తోంది. ఈ కంపెనీ భారతీయ అంతరిక్ష పరిశోధనా సంస్థ (ఇస్రో) ప్రభుత్వ యాజమాన్యంలోని వాణిజ్య విభాగం అయిన యాంట్రిక్స్ కార్పొరేషన్, G-SAT6, G-SAT6A అనే రెండు ఉపగ్రహాలపై 90% ట్రాన్స్ పాండర్ స్థలాన్ని 12 ఏళ్ల లీజుకు ఒప్పందం కుదుర్చుకుంది. 2005లో జరిగిన ఈ ఒప్పందంలో అవకతవకలు జరిగాయని కంపెనీని మూసెయ్యాలని నేషనల్ కంపెనీ లా అప్పిలేట్ ట్రైబ్యునల్ (ఎన్సీఎల్ఏటీ) ఇచ్చిన తీర్పును సుప్రీంకోర్టు కూడా సమర్థించింది. ఇస్రోకు చెందిన యాంత్రిక్స్ కార్పొరేషన్ తో చేసుకున్న డీల్స్ లో అవకతవకలు జరిగాయని ధర్మాసనం పేర్కొంది.
అయితే.. కంపెనీ మూసివేతను సుప్రీం కోర్టు సమర్థించడంతో విస్మయం చెందకుండా దేవాస్ మల్టీమీడియా యొక్క వాటాదారులు విదేశాలలోని భారత ప్రభుత్వ ఆస్తులను స్వాధీనం చేసుకునేందుకు ప్రయత్నిస్తున్నారు. దాదాపు 1.2 బిలియన్ డాలర్లను వసూలు చేసుకునేందుకు వారు ముమ్మర యత్నాలు చేస్తున్నట్టు తెలుస్తోంది. “సుప్రీంకోర్టు నిర్ణయం ఏమీ మారదు. మోడీ ప్రభుత్వం, భారత న్యాయస్థానాలు వాస్తవాలను గ్రహించలేవు. భారతదేశం వెలుపల ఉన్న న్యాయస్థానాలలో వారి చిన్నపాటి మోసపూరిత ఆరోపణలు ఎప్పటికీ నిలబడవు” అని గిబ్సన్, డన్ భాగస్వామి మాథ్యూ డి మెక్‌గిల్ అన్నారు. దీనిపై చర్చలను తిరిగి ప్రారంభించడమే కాకుండా.. పరిష్కార చర్యలను కొనసాగించాలని భారత ప్రభుత్వానికి సూచించారు.
దేవాస్ వాటాదారులు అవార్డులను రికవరీ చేసేందుకు విదేశాల్లోని భారతీయ ఆస్తులను వేటలో ఉన్నట్టు తెలుస్తోంది. పారిస్‌లోని భారతీయ ఆస్తులను స్తంభింపజేయడం కోసం ఫ్రెంచ్ కోర్టు నుంచి ఇప్పటికే ఉత్తర్వును కూడా పొందారు. కెనడాలో భారతదేశ నిధుల ద్వారా నిర్వహిస్తున్న నిధులపై పాక్షిక హక్కులను పొందారు. “మేము ఇప్పటికే తాత్కాలిక హక్కులను నమోదు చేసాం. 10 మిలియన్ల డాలర్ల భారతదేశ ఆస్తులపై స్వాధీనం, గార్నిష్మెంట్ ఆర్డర్‌లను పొందాము” అని దేవాస్ మల్టీమీడియా ప్రతినిధి ఒకరు చెప్పారు.