తెలంగాణ ప్రభుత్వాన్ని డిస్టర్బ్ చేయడానికి యత్నించి, నలుగురు ఎమ్మెల్యేలను కొనుగోలు చేయడానికి ఢిల్లీ నుంచి హైదరాబాద్ వచ్చిన బ్రోకర్ రామచంద్ర భారతిపై మరో కేసు నమోదు అయ్యింది. మొయినాబాద్ ఫామ్ హౌస్లో నలుగురు ఎమ్మెల్యేలతో వందల కోట్ల రూపాయలకు బేరం ఆడుతూ వీడియోలు, ఆడియో రికార్డులకు దొరికిపోయారు ముగ్గురు వ్యక్తులు.. కాగా, ఈ కేసులో ఇవ్వాల హైకోర్టు ఎంక్వైరీకి ఆదేశాలు జారీ చేసింది.
ఇక.. ఈ కేసులో ప్రధాన నిందితుడు అయిన రామచంద్ర భారతిపై బంజారాహిల్స్ పోలీసులు మరో కేసు నమోదు చేశారు. ఎమ్మెల్యే పైలట్ రోహిత్రెడ్డి ఇచ్చిన ఫిర్యాదు ఆధారంగా ఈ కేసు నమోదు చేసినట్టు తెలుస్తోంది. రామచంద్ర భారతి నకిలీ ఆధార్ కార్డు, నకిలీ పాన్ కార్డు, నకిలీ డ్రైవింగ్ లైసెన్స్తో మోసం చేయడానికి యత్నించాడని రోహిత్రెడ్డి ఫిర్యాదు చేసినట్టు సమాచారం. అయితే.. ఎమ్మెల్యేల కొనుగోలు కేసును సీబీఐ, ఈడీ సంస్థల విచారణకు అందజేయాలన్న బీజేపీ పిటిషన్ని హైకోర్టు పక్కన పెట్టిన విషయం తెలిసిందే.