కేవలం రక్త పరీక్షతో క్యాన్సర్ వ్యాధిని నిర్ధారించే ప్రక్రియను భారతీయ కంపెనీ రూపొందించింది. ముంబైకు చెందిన బయోటెక్నాలజీ కంపెనీ ఎపిజనరిస్ కంపెనీ సింగపూర్ లోని జార్ ల్యాబ్స్‌తో కలిసి సంయుక్తంగా ఈ ప్రక్రియను అభివృద్ధి చేసింది. రెండు కంపెనీలు నానోటెక్ సైంటిస్టు వినయ్ కుమార్ త్రిపాఠి, ఆయన కుటుంబ సభ్యుల యాజమాన్యంలోనివే కావడం విశేషం. ఈ ప్రక్రియపై బెర్లిన్ నుంచి వెలువడే మెడికల్ జర్నల్ సానుకూల సమీక్ష ప్రచురించింది. ఈ ప్రక్రియ వందశాతం రుజువైందని పేర్కొన్నది.
రెండు కంపెనీల నిర్వహణలో పాలుపంచుకుంటున్న త్రిపాఠీ ఇద్దరు కుమారులు ఆశిష్, అనీష్ మీడియాకు ఈ ప్రక్రియ గురించి వివరించారు. ఈ ప్రక్రియకు హెచ్ఆర్‌సీ అని పేరు పెట్టారు. వెయ్యిమందిపై జరిపిన పరీక్షల్లో 25 రకాల క్యాన్సర్లు గుర్తించడం జరిగిందని వారు వివరించారు. ముందుగా భారత్‌లో ఈ ప్రక్రియను ప్రారంభించాలని అనుకుంటున్నట్టు చెప్పారు. ఈ ఏడాది చివరలో ఈ తరహా క్యాన్సర్ పరీక్షలను ప్రవేశపెడతామని వివరించారు. రక్తాన్ని సేకరించి మాలిక్యులర్ పరీక్షలు నిర్వహించడం ద్వారా క్యాన్సర్ ను పసిగట్టడం ఈ ప్రక్రియ ప్రత్యేకత. లక్షణాలు బయటపడేందుకు చాలా ముందరే క్యాన్సర్ ఉనికి తెలుస్తుంది. ప్రస్తుతం ఫలితాలు రావడానికి 3-4 రోజులు పడుతున్నది. ఆటోమేషన్‌తో ఈ సమయాన్ని 2 రోజులకు తగ్గించవచ్చని భావిస్తున్నారు. ప్రస్తుత క్యాన్సర్ పరీక్షలు చాలా బాధాకరంగా ఉన్న సంగతి తెలిసిందే. ఈ కొత్త ప్రక్రియలో కేవలం 5 మిల్లీ లీటర్ల రక్తం తీసుకుంటే చాలు. పరీక్ష అయిపోయినట్టేనని అనిశ్ త్రిపాఠీ అన్నారు. కనీస స్థాయిలోనే దీని ధర నిర్ణయిస్తామని వారు వెల్లడించారు.