మధ్యప్రదేశ్లోని సాగర్లో ఓ మహిళను ముగ్గురు, నలుగురు మగాళ్లు కలిసి దారుణంగా కొడుతున్న వీడియో ఒకటి సోషల్ మీడియాలో వైరల్ అయ్యింది. ఆ మహిళ తన ఐదు నెలల శిశువు నేలపై పడి ఏడుస్తుంటే.. కొంతమంది మగాళ్లు ఆ మహిళను రాడ్‌తో దారుణంగా కొడుతున్నారు. అంతేకాకుండా ఆమె ముఖంపై కాలితో తంతున్నారు. ఈ హృదయ విదారక ఘటన వీడియోలో ఆ మహిళను కొడుతున్నది కొంతమంది దుకాణదారులుగా తెలుస్తోంది. ఈ వీడియోలో ఆమెను దుకాణం నుంచి బయటికి లాగేయడం,బస్ట్ స్టాండ్ దగ్గర ఆమె ముఖంపై తన్నడం చూడవచ్చు. ఈ క్రమంలో ఆ మహిళ కన్నీరు మున్నీరుగా విలపిస్తూ ‘భయ్యా మత్ మారో (దయచేసి నన్ను కొట్టవద్దు)’ అంటే ప్రాదేయపడుతోంది.
కాగా, ఆ మహిళ క్యాంటీన్‌లో పాలు కొనేందుకు బస్టాండ్‌కు వెళ్లినట్టు తెలుస్తోంది. ఇంతలో ఏం జరిగిందో కానీ, ఆ మగాళ్లు అంతా కలిసి ఆమెను కొట్టడం ప్రారంభించారు. ఈ వీడియో క్లిప్ ఆధారంగా పోలీసులు విచారణ చేపట్టారు. ఆ మహిళను దారుణంగా కొట్టిన ఘటనపై నిందితులను పట్టుకున్నామని అదనపు పోలీసు సూపరింటెండెంట్ లోకేష్ సిన్హా తెలిపారు. నిందితుల్లో ముగ్గురిని – ప్రవీణ్ రైక్వార్ (26), విక్కీ యాదవ్ (20),రాకేష్ ప్రజాపతి (40) గా పోలీసులు గుర్తించారు. వీరిని- గోపాల్‌గంజ్ పోలీసులు అరెస్టు చేసినట్లు పోలీసు అధికారులు తెలిపారు. నిందితులను కోర్టుకు తరలించే ముందు పోలీసులు రోడ్డుపై పరేడ్ నిర్వహించి మరీ జ్యుడీషియల్ కస్టడీకి పంపినట్టు సమాచారం అందుతోంది.